ភ្នំពេញ៖ ផ្នែកគ្រប់គ្រងសុខភាពបរិស្ថាន និងគ្រោះមហន្តរាយ នៃមនី្ទរសុខាភិបាលរាជធានីភ្នំពេញ បានចុះអប់រំផ្សព្វផ្សាយស្តីពី អនាម័យចំណីអាហារ និងសុវតិ្ថភាពមាត់-ធ្មេញ ជូនដល់សិស្ស ចាប់ពីថ្នាក់ទី១ ​រហូតដល់ទី៦ ចំនួនសរុប២៧៩៤នាក់ នៃសាលាបឋមសិក្សាបាក់ទូក នាព្រឹកថ្ងៃ៣ ខែកក្កដា ឆ្នាំ២០២៣នេះ។

លោក សុខ គឹមសួគ៌ នាយករងសាលាបឋមសិក្សាបាក់ទូក បានមានប្រសាសន៍ថា ថ្ងៃនេះ​សាលា​ទទួលស្វាគមន៍​លោកគ្រូ​ អ្នកគ្រូពេទ្យជំនាញ ​មកពីមនី្ទរសុខាភិបាលរាជធានីភ្នំពេញ ចុះមកធ្វើការ​អប់រំផ្សព្វផ្សាយ ស្តីព អនាម័យ​ចំណីអាហារ​ និងសុវតិ្ថភាពមាត់-ធ្មេញ ជាពិសេសភេសជ្ជៈផ្អែម ដែលធ្វើឲ្យប៉ះពាល់ដល់សុខភាព និងធ្មេញរបស់កុមារ។

ជាមួយគ្នានោះដែរ ទន្តបណ្ឌិត ងី ទិត ប្រធានផ្នែកគ្រប់គ្រងសុខភាពបរិស្ថាន និងគ្រោះមហន្តរាយ រួមនិងអ្នកគ្រូពេទ្យ ហោ លីណែត មន្រ្តីផ្នែកសុខភាពបរិស្ថាន និងគ្រោះមហន្តរាយ នៃមនី្ទរសុខា​ភិបាល​រាជធានីភ្នំពេញ ​បានលើកឡើងរួមគ្នាថា ​កម្មវិធីចុះអប់រំផ្សព្វផ្សាយនេះ បានចាប់ផ្តើមឡើង​កាលពីខែកុម្ភះ ឆ្នាំ២០២៣ រហូតមកដល់ពេលនេះ ​បានចំនួនជិត២០សាលាបឋមសិក្សាហើយ។ ដោយក្នុង១ខែ ក្រុមការងារគ្រូពេទ្យជំនាញ បានចុះធ្វើសកម្មភាពអប់រំ​ ចំនួន៤លើក តាមបណ្តា​សាលាបឋមសិក្សានានាក្នុងរាជធានីភ្នំពេញ ​ដើម្បីចូលរួមពង្រឹងការអនុវត្ត និងសំដៅលើកកម្ពស់​សុខុមាលភាព សុវតិ្ថភាព និងអនាម័យនៅតាមគ្រឹះស្ថានសិក្សា​ចំណេះទូទៅសាធារណៈ ក្នុងរាជធានីភ្នំពេញ។

ជាចុងក្រោយ ក្នុងនាមសាលា លោកគ្រូ អ្នកគ្រូ សិស្សានុសិស្ស លោក សុខ គឹមសួគ៌ ប្តេជ្ញា​ចិត្តលុបបំបាត់​ភេសជ្ជៈផ្អែម ​ចានស្នោប៉ះពាល់បរិស្ថាន ទន្ទឹមនឹងនោះស្នើឲ្យអាណាព្យាបាល​សិស្ស រៀបចំចាន ​ឬចានស្រាក់ជូនកូនៗរបស់គាត់ ​ដោយដាក់អាហារពីផ្ទះមក រួចយកទៅផ្ទះវិញ ជៀសវាង​ការប្រើប្រាស់ចាន ឬប្រអប់ស្នោ ​ដោយមិនបាច់បំផ្លាញបរិស្ថានក្នុងសាលារៀន៕ អត្ថបទ រដ្ឋា