ភ្នំពេញ៖ មន្រ្តីជាន់ខ្ពស់ក្រសួងផែនការ បានលើកឡើងថា ក្នុងកំឡុងដើមខែកក្កដា ឆ្នាំ ២០២៣នេះ មន្រ្តីជំនាញនឹងចាប់ផ្ដើមយុទ្ធនាការមួយ គឺចុះទៅសម្ភាសកំណត់ផ្ដល់ប័ណ្ណក្រីក្រ ជូនដល់អ្នកធ្វើការក្នុងវិស័យសេវាកម្សាន្ត ​នៃសេដ្ឋកិច្ចក្រៅប្រព័ន្ធ។

ឯកឧត្តម ថេង បញ្ញាធន ប្រតិភូរាជរដ្ឋាភិបាលទទួលបន្ទុក ជាអគ្គនាយកផែនការ នៃក្រសួងផែន​ការបានលើកឡើងថា ​រាជរដ្ឋាភិបាលបានសម្រេចឱ្យក្រសួងផែនការ ចាប់ផ្ដើមយុទ្ធនាការ​ចុះកំណត់​អត្តសញ្ញាណគ្រួសារក្រីក្របន្ថែម​ សម្រាប់អ្នកធ្វើការក្នុងវិស័យ​ សេវាកម្សាន្តនៃសេដ្ឋកិច្ចក្រៅប្រព័ន្ធ។ អ្នកធ្វើការក្នុងវិស័យសេវាកម្សាន្តនេះគឺផ្តោតលើអ្នកធ្វើការក្នុងរង្គសាល ​ឌីស្កូតែក ​ខារ៉ាអូខេ បៀរហ្កាឌិន ​កន្លែងម៉ាស្សា និងស៉្បាជាដើម។

ឯកឧត្តមថា យុទ្ធនាការនេះ គឺធ្វើក្នុងរយៈពេលខ្លី ហេតុដូចនេះគឺចាំបាច់ឱ្យអ្នកមានជីវភាពខ្វះខាត ធ្វើការក្នុងវិស័យខាងលើ ​ត្រូវត្រៀមឯកសារចាំបាច់ឱ្យរួចរាល់សម្រាប់ការសម្ភាសន៍។ ឯកសារចាំបាច់ ​គឺសំដៅលើអត្តសញ្ញាណប័ណ្ណ ក៏ដូចជាសៀវភៅគ្រួសារជាដើម។

ឯកឧត្តមប្រតិភូ បន្តថា ការចុះសម្ភាសន៍នេះ ​គឺអាចធ្វើឡើងនៅទីតាំងបំពេញការងាររបស់ អ្នកទាំងនោះ​ដោយផ្ទាល់។ ដំណាក់កាលដំបូង គឺផ្អែកលើរបាយការណ៍ដែលក្រសួងទេសចរណ៍​បានស្រង់​រួចរាល់​មួយចំនួន ទាំងក្នុងរាជធានីភ្នំពេញ និងតាមបណ្ដាខេត្ត។

ចំពោះអ្នកខកខានក្នុងការសម្ភាសន៍នៅក្នុងយុទ្ធនាការនេះ ​ពួកគេដែលមានជីវភាពក្រីក្រ គឺអាច​ស្នើសុំការសម្ភាសន៍នៅឃុំ-សង្កាត់ដែលខ្លួនរស់នៅ រឺក៏អាចដាក់ពាក្យស្នើសុំការសម្ភាសន៍​តាមរយៈកម្មវិធី​ទូរស័ព្ទរបស់ក្រសួងផែនការ។

សម្រាប់អ្នកធ្វើការក្នុងវិស័យសេវាកម្សាន្ត សេដ្ឋកិច្ចក្រៅប្រព័ន្ធ ក្នុងករណីពួកគេពុំមានជីវភាព​ក្រលំបាក ពួកគេក៏អាចទទួលបាន ប័ណ្ណមូលនិធិសមធម៌សុខាភិបាល សម្រាប់ការទទួល​សេវាពិនិត្យ ព្យាបាលដោយមិនគិតថ្លៃនៅតាមមណ្ឌលសុខភាព​ និងគ្រប់មន្ទីរពេទ្យរដ្ឋទាំងអស់។ នេះជាកម្មវិធីថ្មី ដែលទើបប្រកាសដាក់ឱ្យអនុវត្ត។

ចំពោះប័ណ្ណក្រីក្រវិញ ជាប័ណ្ណដែលមានអាទិភាពខ្លាំង ដោយគ្រួសារក្រីក្រដែលមានប័ណ្ណ​គឺ​ទទួលបានការជួយផ្គត់ផ្គង់ជាថវិកា ពីរាជរដ្ឋាភិបាលជារៀងរាល់ខែ។ ជាក់ស្ដែងគិតចាប់ពី ការ​អនុវត្តកម្ម​វិធី​ឧបត្ថម្ភសាច់ប្រាក់ជួយដល់គ្រួសារក្រីក្រ ​កាលពីខែមិថុនា​ ឆ្នាំ​ ២០២០​ មកទល់ខែ មិថុនា​ ឆ្នាំ ២០២៣ គឺរាជរដ្ឋាភិបាលបានចំណាយថវិកា​សរុបរហូតដល់​ ១ ០៨៨លានដុល្លារ ជួយ​ដល់គ្រួសារក្រីក្រប្រមាណ ៧០ម៉ឺនគ្រួសារ។ បច្ចុប្បន្នការជួយឧបត្ថម្ភនេះ គឺកំពុងតែបន្តការអនុវត្ត៕អត្ថបទ៖ គឹមហុក