​បាល់ទាត់៖ ​ក្រុម​ជើងឯក​លី​គ​កំពូល​ស្កុ​ត​ឡេ​ន Glasgow Rangers បាន​ស្នើសុំ​កុំ​អោយ​អ្នកគាំទ្រ​របស់​ខ្លួន​ ប្រមូល​ផ្តុំ​គ្នា​អបអរ​សាទរ​នៅ​សប្ដាហ៍​ចុងក្រោយ​ នៃ​លី​គ​កំពូល​ស្កុ​ត​ឡេ​ន​។ ​Rangers នឹង​ទទួល​ពាន​ជើងឯក​លី​គ​ស្កុ​ត​ឡេ​ន​របស់​ខ្លួន​នៅក្នុង​កីឡដ្ឋាន Ibrox​ ក្នុង​ការ​ប្រកួត​សប្ដាហ៍​ចុងក្រោយទទួល​ស្វាគមន៍ Aberdeen នៅ​ថ្ងៃ​សៅរ៍​នេះ​។

​​តែ​អ្នកគាំទ្រ​នៅតែ​មិន​ត្រូវ​បាន​អនុញ្ញាត​ អោយ​ចូល​ទស្សនា​ក្នុង​កីឡដ្ឋាន​នៅឡើយ កីឡាករ​ក្នុង​ក្រុម​ទាំងអស់​នឹង​មិន​អាច​ចែក​រំលែក​ភាព​សប្បាយ​រីករាយ​រប​ស់​ខ្លួន ​ជាមួយ​អ្នកគាំទ្រ​បាន​ឡើយ​។ ​Rangers បាន​ស្នើ​អោយ​អ្នកគាំទ្រ​គោរព​ តាម​វិធានការ​សុខាភិបាល​របស់​រដ្ឋាភិបាល ស្រប​ពេល​ជំងឺ​រាតត្បាត Covid-19 នៅ​មាន​វត្តមាន​នៅឡើយ​។ ​សូម​បញ្ជាក់​ថា Glasgow Rangers បាន​ដឹង​ខ្លួន​ថា ​គ្រង​ជើងឯក​លី​គ​កំពូល​ស្កុ​ត​ឡេ​ន ​ជា​លើកដំបូង​តាំងពី​ដើមខែមីនា​កន្លងទៅ ហើយ​នៅ​ពេល​នោះ​ដែរ​អ្នកគាំទ្រ Rangers រាប់​ពាន់​នាក់​បាន​ប្រមូល​ផ្តុំគ្នា​ដោយ​មិន​រក្សា​គំលាត និង​ឈាន​ដល់​ការ​ប៉ះ​ទង្គិច​ជាមួយ​ក្រុម​នគរបាល​​ផង​ដែរ​។​

​​ក្រុម​របស់​លោក Steven Gerrard មក​ដល់​ពេល​នេះ​មិនទាន់​ស្គាល់​ពាក្យ​ថា ​ចាញ់​នៅឡើយ​រដូវ​កាល​នេះ​ ​កំពុង​មាន ៩៩​ពិន្ទុ​ក្រោយ​ជ័យជំនះ ៣-០ កាលពី​ថ្ងៃ​ពុធ​នៅ​ទឹកដី Livingston​។ នេះ​ជា​ជើងឯក​លី​គ​កំពូល​ស្កុ​ត​ឡេ​ន​ដំបូង​របស់ Rangers ក្នុង​មួយ​ទសវត្សរ៍​ចុងក្រោយ​ដែល​គ្រប់គ្រង​ដោយ​ក្រុម​ក្បែរ​របង Glasgow Celtic៕

​អត្ថបទ​៖​នាង សុភា​វុ​ធ