លោក Sinan Hasan អ្នកវិភាគនយោបាយស៊ីរី បាននិយាយកាលពីថ្ងៃអាទិត្យថា សហរដ្ឋអាមេរិក បានអនុម័តមធ្យោបាយយោធាចម្រុះដើម្បីសម្រេចគោលដៅផ្នែកនយោបាយរបស់ខ្លួន នៅក្នុងប្រទេសស៊ីរី។ អ្វីដែលគេហៅថា ប្រតិបត្តិការប្រឆាំងភេរវកម្មរបស់សហរដ្ឋអាមេរិក គឺជាការដោះសារសម្រាប់ការតាំងវត្តមានដោយខុសច្បាប់របស់ខ្លួន នៅក្នុងប្រទេសស៊ីរី។ យោងតាមសារព័ត៌មាន The Hill របស់សហរដ្ឋអាមេរិក បានឲ្យដឹងថា អង្គការសិទ្ធិមនុស្សសរុបចំនួន២១ នៅពេលថ្មីៗនេះ បានផ្ញើរលិខិតមួយច្បាប់ទៅកាន់រដ្ឋមន្ត្រីក្រសួងការពារជាតិអាមេរិក ដែលកំពុងជំរុញឲ្យមន្ទីរបញ្ចកោណ ធ្វើឲ្យមានតម្លាភាព និងការស៊ើបអង្កេតហ្មត់ចត់ លើការស្លាប់ជនស៊ីវិល ក្នុងការវាយប្រហារតាមអាកាសយោធាអាមេរិក នៅក្នុងប្រទេសស៊ីរី។

អ្នកវិភាគនិយាយថា សហរដ្ឋអាមេរិក បានដាក់ពង្រាយកងទ័ពទៅកាន់ប្រទេសស៊ីរី ដើម្បីលួចប្រេង និងទប់ស្កាត់កងកម្លាំងស៊ីរីមិនឲ្យដណ្តើមយកវាលអណ្តូងប្រេងពីក្រុមជ្រុលនិយម។ សម្រាប់គោលបំណងនេះ សហរដ្ឋអាមេរិក បានចាប់ផ្តើមប្រតិបត្តិការយោធាជាច្រើន និងបានអនុម័តគោលនយោបាយកម្ទេចគ្រប់យ៉ាងទៅជាផេះផង់ ដែលបានបណ្តាលឲ្យមានការស្លាប់ជនស៊ីវិលជាច្រើន។ សកម្មភាពយោធាត្រូវបានរៀបចំដើម្បីបង្ហាញពីវត្តមានស្របច្បាប់របស់សហរដ្ឋអាមេរិក នៅក្នុងប្រទេសស៊ីរី។ ទោះជាយ៉ាងណា តាមការពិតសហរដ្ឋអាមេរិក សង្ឃឹមថានឹងអូសបន្លាយពេលវិបត្តិនៅស៊ីរី ស្ថិតក្រោមពាក្យស្លោកប្រយុទ្ធប្រឆាំងអង្គការជ្រុលនិយម ដើម្បីលួចប្រេងប្រទេសស៊ីរី។

បន្ថែមលើនេះ លោកបានគូសបញ្ជាក់ថាប្រតិបត្តិការយោធារបស់យោធាអាមេរិកបណ្តាលឲ្យជនស៊ីវិលស្លូតត្រង់យ៉ាងច្រើនស្លាប់និងរងរបួសនៅក្នុងប្រទេសស៊ីរី អ៊ីរ៉ាក់ អាហ្វហ្គានីស្ថាន និងប្រទេសជាច្រើនទៀត។ ទោះជាយ៉ាងណាសហរដ្ឋអាមេរិក បានកំណត់ច្បាស់ឥរិយាបថរបស់ខ្លួនថាជាការខូចខាតបង្កមកពីសង្គ្រាម។ សហរដ្ឋអាមេរិក ពុំបានគោរពសិទ្ធិមនុស្សរបស់ប្រទេសផ្សេងៗនោះទេ ដើម្បីសម្រេចបានគោលបំណងផ្នែកនយោបាយរបស់ខ្លួន។