នគរបាលហុងកុងនៅថ្ងៃចន្ទនេះ បានចោទប្រកាន់សកម្មជន៨នាក់មានមូលដ្ឋាននៅបរទេសពីបទល្មើសច្បាប់សន្តិសុខជាតិដ៏«ធ្ងន់ធ្ងរ»ក្នុងនោះមានការឃុបឃិតជាមួយបរទេស និងផ្តល់រង្វាន់១លានដុល្លារហុងកុងសម្រាប់ការផ្តល់ព័ត៌មាននាំទៅរកការចាប់ខ្លួនណាមួយនោះ។

នគរបាលបានថ្លែងប្រាប់សន្និសីទសារព័ត៌មានមួយថា អ្នកដែលត្រូវបានកំណត់គោលដៅរួមមាន លោក ណាថាន ឡវ៍ ( Nathan Law) និងលោក អានណា ក្វូក (Anna Kwok) អតីតសមាជិកសភា លោក ដិននីស ក្វូក (Dennis Kwok) និងលោក ថិដ ហួយ (Ted Hui) និងមេធាវី ខេវិន យ៉ាម (Kevin Yam)។

សកម្មជនទាំងនោះ មានមូលដ្ឋាននៅកន្លែងផ្សេងៗគ្នា រួមមានសហរដ្ឋអាមេរិក ចក្រភពអង់គ្លេស និងអូស្ត្រាលី។ សារព័ត៌មាន Reuters មិនអាចទាក់ទងអ្នកណាម្នាក់ក្នុងចំណោមពួកគេភ្លាមៗនោះទេ។

នគរបាល បានប្រាប់សន្និសីទសារព័ត៌មាននោះថា មនុស្សចំនួន២៦០នាក់ ត្រូវបានចាប់ខ្លួននៅក្រោមច្បាប់សន្តិសុខជាតិកំណត់ដោយចិន ចាប់តាំងពីច្បាប់នេះ បានចូលជាធរមាននៅឆ្នាំ២០២០ ដែលក្នុងនោះមនុស្ស៧៩នាក់ ត្រូវបានផ្តន្ទាទោសពីបទល្មើសផ្សេងៗគ្នា រួមមានការធ្វើវិទ្ធង្សនា និងអំពើភេរវកម្ម។

ប្រទេសមួយចំនួនរួមមានសហរដ្ឋអាមេរិកនិយាយថា ច្បាប់សន្តិសុខជាតិ ត្រូវបានប្រើជាឧបករណ៍ដើម្បីបង្ក្រាបចលនាគាំទ្រលទ្ធិប្រជាធិបតេយ្យនៅទីក្រុងនេះ ហើយវាបានធ្វើឱ្យប៉ះពាល់សិទ្ធិនិងសេរីភាពរបស់ទីក្រុងហុងកុង។ 

ទោះបីជាយ៉ាងណាក៏ដោយ អាជ្ញាធរចិននិងហុងកុង និយាយថា ច្បាប់នេះ បានស្តារស្ថិរភាព ក្រោយពីអតីតដែនដីអណានិគមអង់គ្លេស ត្រូវរង្គោះរង្គើដោយការតវ៉ាប្រឆាំងចិនអូសបន្លាយដ៏យូរ ក្នុងឆ្នាំ២០១៩។