កំពង់ស្ពឺ៖ ឯកឧត្តម ហ៊ុន ម៉ានី អនុប្រធានទី១ ក្រុមការងារគណបក្សប្រជាជនកម្ពុជា ចុះមូលដ្ឋាន​ជួយ​ខេត្តកំពង់ស្ពឺ នៅថ្ងៃទី៤ ខែកក្កដា ឆ្នាំ២០២៣នេះ បាន​ជួបសំណេះសំណាល​ជាមួយក្រុមគ្រួសារ​គណបក្សប្រជាជនកម្ពុជា ​ដែលរស់នៅ ឃុំធម្មតាអរ និងឃុំកាហែង ស្រុកសំរោងទង ខេត្តកំពង់ស្ពឺ។

ការជួបសំណេះសំណាលនេះ ឯកឧត្តម ហ៊ុន ម៉ានី បានលើកឡើងប្រាប់ទៅសមាជិកសមាជិកា រស់នៅ​ក្នុងមូលដ្ឋានថា ​បើគណបក្សប្រជាជនកម្ពុជា ​នៅតែបន្តឈ្នះឆ្នោតពេលខាងមុខ ក្រៅពីរក្សា​សុខសន្តិភាព ការអភិវឌ្ឍ គឺនឹងធានារក្សារាល់អត្ថប្រយោជន៍ទាំងអស់ សម្រាប់ប្រជាពលរដ្ឋក៏ដូចជា​កម្មករកម្មការិនី​កំពុងទទួលបានពេលបច្ចុប្បន្ន។

អត្ថប្រយោជន៍គឺសំដៅលើកម្មវិធីជំនួយសង្គមជាច្រើន សម្រាប់ប្រជាពលរដ្ឋ ក៏ដូចជាអត្ថប្រយោជន៍​ដែលកម្មករកម្មការិនី ជាពិសេសកម្មការិនីដែលមានផ្ទៃពោះកំពុង​ទទួលបាន ក៏ដូចជាការដំឡើង​ប្រាក់ខែ​ជារៀងរាល់ឆ្នាំ ​សម្រាប់កម្មករកម្មការិនី ​ទោះក្នុងស្ថានការណ៍ណាក៏ដោយ។

ឯកឧត្តមថា គណបក្សប្រជាជនកម្ពុជា​ គឺមានគោលដៅបម្រើដល់ប្រជាពលរដ្ឋគ្រប់រូប ធ្វើអ្វីគ្រប់​យ៉ាង​ដើម្បីប្រជាពលរដ្ឋ និងមិនទុកពលរដ្ឋណាមួយអោយនៅដាច់ដោយឡែកនោះទេ។

ឯកឧត្តម ​ក៏បានផ្ដែផ្ដាំទៅឪពុកម្ដាយ ​អាណាព្យាបាល ​ដែលមានកូនចៅ ​ធ្វើការនៅតាមរោងចក្រ មិនត្រូវ​ជឿពាក្យញុះញង់ របស់ជនមួយចំនួន ដែលថានឹងមានការបិទរោងចក្រ ពេលដែល​គណបក្សប្រជាជនឈ្នះឆ្នោតនោះទេ។

ខណៈការបោះឆ្នោតខិតចូលមកដល់​ ឯកឧត្តម​ បានក្រើនរម្លឹកអោយពលរដ្ឋគ្រប់អាយុបោះឆ្នោត ត្រូវតែត្រៀមឯកសារចាំបាច់ ​សម្រាប់ការបោះឆ្នោត។ ឯកសារនោះ គឺសំដៅលើអត្តសញ្ញាណប័ណ្ណ និងឯកសារបញ្ជាក់អត្តសញ្ញាណ ។

ទន្ទឹមនឹងមានឯកសារគ្រប់គ្រាន់ ​ឯកឧត្តមបញ្ជាក់អោយសមាជិក សមាជិកា ដឹងពី​របៀបគូសសន្លឹក​ឆ្នោតអោយបានត្រឹមត្រូវ ​ដើម្បីធានាថាជាសន្លឹកឆ្នោតបានការ។

សម្រាប់សមាជិកសមាជិកា គណបក្សប្រជាជន ដែលបានគាំទ្រគណបក្សតាំងពីការចាប់ផ្ដើម​បោះឆ្នោត​លើកដំបូងនៅកម្ពុជា​ ពួកគេនៅ​តែ​បង្ហាញឆន្ទៈគាំទ្រ​គណបក្សប្រជាជនកម្ពុជា។ ការបន្តគាំទ្រ ​ដោយសារពួកគេទទួលបានជីវិត​ រស់នៅដោយសុខសន្តិភាព គ្មានភាពភ័យ​ខ្លាចដោយសារសង្គ្រាម​ និងមើលឃើញផ្ទាល់ពីការរីកចំរើន។

បច្ចុប្បន្នចាប់រាប់ពីថ្ងៃទី ១ ខែកក្កដា រហូតដល់ថ្ងៃទី ២១ ខែកក្កដា ឆ្នាំ ២០២៣ ជាកំឡុងពេល​បើក​យុទ្ធនាការឃោសនាបោះឆ្នោត។ គ្រប់គណបក្សមានសិទ្ធិ ហែរក្បួន ​ផ្សព្វផ្សាយឃោសនា ពី​គោលនយោបាយរបស់ខ្លួន ដើម្បីស្វែងរកអ្នកគាំទ្រ ខណៈការបោះឆ្នោតជ្រើសរើសតំណាង​រាស្រ្តនីតិកាលទី ៧ ​ដែលនឹងប្រព្រឹត្តិទៅនៅថ្ងៃទី ២៣ ខែកក្កដា ឆ្នាំ​ ២០២៣ខាងមុខ គឺមាន​គណបក្សចូលរួមប្រកួតប្រជែងចំនួន ១៨គណបក្ស៕ អត្ថបទ៖ គឹមហុក