ការដ្ឋានសាងសង់ស្ពានកោះពេជ្រ-កោះនរា ឆ្លងកាត់ទន្លេបាសាក់ សម្រេចបានប្រមាណ ៨៥%ហើយ នឹងបញ្ចប់ការសាងសង់នៅខែវិច្ឆិកា ឆ្នាំ២០២៣ ខាងមុខ។
មន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា គិតត្រឹមថ្ងៃទី៣ ខែកក្កដា ឆ្នាំ២០២៣ ការដ្ឋានសាងសង់ស្ពានកោះពេជ្រ-កោះនរា ឆ្លងកាត់ទន្លេបាសាក់ សម្រេចបានប្រមាណ ៨៥% នៃគម្រោង។ តាមផែនការ គម្រោងសាងសង់ស្ពានកោះពេជ្រ-កោះនរា នឹងបញ្ចប់ការសាងសង់នៅខែវិច្ឆិកា ឆ្នាំ២០២៣ ខាងមុខ។
ស្ពានថ្មីនេះ នឹងភ្ជាប់ចរាចរពីតំបន់ភូមិសាស្ត្រក្នុងទីក្រុង ទៅមកតំបន់ភូមិសាស្ត្រខណ្ឌច្បារអំពៅ ផ្លូវជាតិលេខ១ និងកាត់បន្ថយការកកស្ទះចរាចរនៅលើស្ពានព្រះមុនីវង្សទាំងពីរផងដែរ ។
ស្ពានឆ្លងកាត់ទន្លេបាសាក់ដែលភ្ជាប់ពីកោះពេជ្រ ទៅកាន់ទីក្រុងរណបកោះនរា បានបើកការដ្ឋានសាងសង់កាលពីថ្ងៃទី២៦ ខែតុលា ឆ្នាំ២០២០ ។ ស្ពាននេះ មានប្រវែង ៨២៤ម៉ែត្រ មានទទឹង ២៤.៥០ម៉ែត្រ គ្រោងចំណាយពេលសាងសង់រយៈពេល ៣៥ខែ និងចំណាយថវិកាប្រមាណ ៣៨លានដុល្លារសហរដ្ឋអាមេរិក។ ស្ពានដ៏សំខាន់នេះដែរត្រូវបានវិនិយោគសាងសង់ដោយក្រុមហ៊ុនវិនិយោគទុនអណិកជនកម្ពុជា OCIC និងក្រោមការគ្រប់គ្រងរបស់រដ្ឋបាលរាជធានីភ្នំពេញ។
សូមជម្រាបជូនថា ស្ពានបេតុងថ្មីមួយនេះ ត្រូវបានបែងចែកការសាងសងជាពីរ ទីមួយសាងសង់ស្ពានខ្សែកាបភ្ជាប់ពីកោះពេជ្រ ទៅកាន់គម្រោងអភិវឌ្ឍន៍កោះនរា ចំណែកឯស្ពានទី២ គឺសាងសង់បន្តពីគម្រោងអភិវឌ្ឍន៍កោះនរា ទៅផ្លូវជាតិលេខ១។ ក្រៅពីស្ពានទាំងពីរ ក៏មានការសាងសង់ផ្លូវក្បាលស្ពានខាងកោះពេជ្រ ប្រវែង ២៤៩ម៉ែត្រ ចំណែកឯក្បាលស្ពានកោះនរា ត្រូវភ្ជាប់ដោយផ្លូវប្រវែង ៩២ម៉ែត្រ។ គម្រោងស្ពានបេតុងនេះ ធ្វើឡើងជាស្ពានមានលក្ខណៈទ្វេទិស ដែលមានគន្លងសម្រាប់រថយន្ត២ទៅ និងគន្លងសម្រាប់រថយន្ត២មក មានប្រវែង ៣.២៥ម៉ែត្រ ក្នុងមួយគន្លង។ ក្រៅពីរថយន្ត ស្ពានថ្មីនេះ ក៏មានគន្លងទទឹងប្រវែង១.២៥ម៉ែត្រ សម្រាប់ទោចក្រយាន្តទៅមកផងដែរ។
សម្រាប់ស្ពានបេតុងថ្មីមួយនេះ ត្រូវបានកំណត់ការបើកបរត្រឹម៤០គីឡូម៉ែត្រក្នុងមួយម៉ោង ជាល្បឿនសុវត្ថិភាព ដែលមិនបង្កគ្រោះថ្នាក់ ព្រោះស្ពានមានជម្រាលទទឹង២ភាគរយ។ ស្ពានបេតុងខ្សែកាបនេះ ប្រើប្រាស់សសរព្យួរខ្សែកាបកម្ពស់៦០ម៉ែត្រ ដែលគិតចាប់ពីតួនៃស្ពានទៅ ហើយសម្រាប់សសរស្ពានព្យួរខ្សែកាបវិញ មានចំនួន២ដើម ដោយប្រើប្រាស់គ្រឹះខួងសសរទី១ មានជម្រៅ ៥៩.៤០ម៉ែត្រ ហើយសសរទី២ ជម្រៅ៧៣.៤០ម៉ែត្រ។ ស្ពាននេះត្រូវបានសាងសង់ឡើងដោយប្រើសសរសរុបចំនួន៦ដើម ត្រើយខាងកោះពេជ្រ ៣ដើម និងខាងកោះនរា ៣ដើម។ សម្រាប់ជើងតាងស្ពានមានទំហំ ២៤.៣ម៉ែត្រ គុណនឹង ១៧.៧ម៉ែត្រ គុណនឹង ៤.៥ម៉ែត្រ និងកម្ពស់ក្រោមស្ពាននាវាឆ្លងកាត់ ៨ម៉ែត្រ នៅរដូវវស្សា និង១៨ម៉ែត្រ នៅរដូវប្រាំង។ ចំណែកឯ គម្លាតពីសសរស្ពានខ្សែកាបវិញ មានប្រវែង១៨០ម៉ែត្រ ហើយសសរស្ពានខ្សែកាប មានចំនួន១៦ដើមសងខាងស្ពាន ដែលក្នុងមួយដើមខ្សែកាបតូចៗភ្ជាប់ពី២៧ ទៅ៣១ដើម មានអង្កត់ផ្ចិត ១៥.២មីលីម៉ែត្រ។ ចំពោះសសរស្ពានខ្សែកាបនៃត្រើយទាំង២ មានចម្លាក់ឆ្លាក់ជារចនាបថបែបខ្មែរផងដែរ។ នៅតាមបណ្ដាយនៃស្ពានក៏មានបង្គោលភ្លើងបំភ្លឺ ហើយលូក៏ត្រូវបានរៀបចំជាបណ្ដាញអមសងខាងផ្លូវនៅក្បាលស្ពាន។ ស្លាកសញ្ញាចរាចរណ៍ និងគំនូសចរាចរណ៍ ក៏មាននៅលើស្ពាន។
ចំពោះគម្រោងសាងសង់បន្តចាប់ពីកោះនរា ទៅផ្លូវជាតិលេខ១ បណ្ដោយស្ពានសរុបប្រវែង៦០ម៉ែត្រ ដោយទទឹងប្រវែង២១ម៉ែត្រ និងបណ្ដោយស្ពានបេតុង ប្រវែង៤៥ម៉ែត្រ ផ្លូវគល់ស្ពានសងខាងប្រវែង១៥ម៉ែត្រ។ ការសាងសង់ភ្ជាប់នេះ ត្រូវប្រើរយៈពេលចំនួន១២ខែ៕ អត្ថបទ៖ ប្រាក់ វ៉ាន់ដា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
