ភ្នំពេញ៖ ដោយសារមើលឃើញពីការអភិវឌ្ឍ និងតែងតែគិតគូរជាប់ជានិច្ចរបស់​ប្រមុខរាជ​រដ្ឋាភិបាល​កម្ពុជា​មកកាន់កម្មករនិយោជិត ក្រុមកម្មការិនីក្នុងវិស័យកាត់ដេរ បានលើកឡើងដូចគ្នាថា​ ពិតជាចង់ឃើញសម្តេចតេជោ ហ៊ុន សែន បន្តដឹកនាំប្រទេសទៅ​មុខតទៀត ជាពិសេស​ទាក់ទាញអ្នកវិនិយោគបង្កើតរោងចក្រកាន់តែច្រើន​ ដើម្បីបង្កើតការងារ និងប្រាក់ចំណូលទៀងទាត់ដូចសព្វថ្ងៃនេះ។

នៅក្នុងកិច្ចសម្ភាសជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី៤ ខែកក្កដានេះ ក្រុមកម្មការិនី​បម្រើការងារ​នៅរោងចក្រកាត់ដេរសម្លៀកបំពាក់ ឌូហឹស្ត ខេមបូឌា ស្ថិតនៅតំបន់ទួលពង្រ ខណ្ឌពោធិ៍សែនជ័យ ​រាជធានីភ្នំពេញ បានលើកឡើងថា ​ការងារដែលមានធ្វើសព្វថ្ងៃនេះ គឺបាន​មកពីការដឹកនាំដ៏ល្អរបស់ប្រមុខរាជរដ្ឋាភិបាលកម្ពុជា។

ពួកគាត់ឲ្យដឹងទៀតថា ​ក្រៅពីការងារមានធ្វើរាល់ថ្ងៃ សម្តេចលោក​តែងតែ​យកចិត្តទុកដាក់បន្ថែម​ទៅ​ដល់ការដំឡើង​ប្រាក់ឈ្នួល​អប្បបរមា​ជារៀងរាល់ឆ្នាំ ​ហើយលោកក៏មិនដែលរំលងផងដែរ នូវការ​ផ្តល់របបគាំពារសង្គមនានា​ ធ្វើឲ្យពួកគាត់មានអារម្មណ៍ថាកក់ក្តៅ។

ក្រុមកម្មការិនីទាំងនេះ សង្ឃឹមទៀតថា ​ក្រោយចប់ការបោះឆ្នោត​នាពេលខាងមុខនេះ ពួកគាត់​នឹងអាចបានជួបសំណេះសំណាលដោយផ្ទាល់ជាមួយសម្តេចតេជោ​ ហ៊ុន សែន ខណៈរាល់ថ្ងៃនេះ​បានឃើញតែក្នុងទូរទស្សន៍ ​និងតាមបណ្តាញសង្គមតែប៉ុណ្ណោះ។

កម្មករ និយោជិតរោងចក្រ ក៏បានលើកឡើងថា ពីមួយឆ្នាំទៅមួយឆ្នាំ បានមើលឃើញថា ការបង្កើតរោងចក្រថ្មីៗមានជាបន្តបន្ទាប់ និងគ្រប់កន្លែង ដោយសារកម្ពុជាគោលនយោបាយដ៏ល្អ ក្នុងការទាក់ទាញអ្នកវិនិយោគឲ្យមកបណ្តាក់ទុន​ និងគ្រប់គ្រងសេដ្ឋកិច្ចបានយ៉ាងល្អ ទោះបីជាកម្ពុជាបានជួបប្រទះនូវវិបត្តិសាកលកូវីដ១៩៕អត្ថបទ៖ ឈិត បូរ៉ាវី