ភ្នំពេញ៖ មកដល់ពេលនេះ មានអ្នកបម្រើការសេដ្ឋកិច្ចក្រៅប្រព័ន្ធ នៅតាមអាជីវកម្មទេសចរណ៍ក្លឹបកម្សាន្តនានា មានប្រមាណជាង១០០០នាក់រួចហើយ ទទួលបានបណ្ណមូលនីធិសមធម៌ របស់ ប.ស.ស ថែទាំសុខភាពព្យាបាលជំងឺដោយមិនគិតថ្លៃ ហើយមន្ត្រីជំនាញតាមស្ថាប័នពាក់ព័ន្ធបាននិងកំពុងចុះសំរង់ព័ត៌មានទិនិ្នន័យដើម្បីបន្តផ្តល់បណ្ណនោះថែមទៀត។

បើតាមតំណាងអ្នកគ្រប់គ្រងភោជនីយដ្ឋាន និងKTV ប៊ីហ្គូល នៅក្រុងតាខ្មៅ ខេត្តកណ្តាល និងអ្នកបម្រើការសេដ្ឋកិច្ចក្រៅប្រព័ន្ធ បានថ្លែងប្រាប់BTVថា យើងទាំងអស់គ្នាពិតជាមានក្តីសប្បាយ​រីករាយណាស់ ដែលប្រមុខថ្នាក់ដឹកនាំរាជរដ្ឋាភិបាល បានសម្រេចអនុវត្តគោលនយោបាយ ផ្តល់​បណ្ណមូលនីធិសមធម៌ របស់ ប.ស.ស ថែទាំសុខភាពព្យាបាលជំងឺមិនគិតថ្លៃ សម្រាប់អ្នកបម្រើការ​ក្នុង​​សេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ ជាពិសេសស្ត្រីដែលបម្រើការនៅតាមរង្គសាល, ឌីស្កូតក, ខារ៉ាអូខេ KTV, បៀរហ្គាឌិន, កន្លែងម៉ាស្សា និងស្ប៉ា ដូចមន្ត្រីរាជការ និងអ្នកបម្រើការសេដ្ឋកិច្ចក្នុងប្រព័ន្ធដែរ។

ឯកឧត្តម ហេង សុផាន់ណារិទ្ធ អ្នកនាំពាក្យបេឡាជាតិសន្តិសុខសង្គម ប.ស.ស ថ្លែងថា រហូតមក​ដល់ពេលនេះ ប.ស.ស បានចុះឈ្មោះនិងបាន​ចេញបណ្ណមូលនីធិសមធម៌ជូន​អ្នកបម្រើការសេដ្ឋកិច្ច​ក្រៅប្រព័ន្ធ តាមអាជីវកម្មទេសចរណ៍សេវាកម្សាន្តបាន១០៧៩នាក់រួចហើយ ដើម្បីឲ្យពួកគាត់​ប្រើប្រាស់​ប្រព័ន្ធសេវាសុខាភិបាលព្យាបាលជំងឺដោយឥតគិតថ្លៃ ហើយបច្ចប្បន្នយើងកំពុងធ្វើបន្ត​ទៀត​លើការងារទាំងអស់នេះ។

លោក សុខ វណ្ណា ប្រធាននាយកដ្ឋានគ្រប់គ្រងសេវាកម្សាន្ត និងកីឡាទេសចរណ៍ ក្រសួង​ទេសចរណ៍ បានឲ្យដឹងថា មកដល់បច្ចុប្បន្នអាជីវកម្មក្លឹបកម្សាន្ត ខារ៉ាអូខេ រង្គសាល ឌីស្កូតែក និងបៀហ្គាឌិន ​បានចុះបញ្ជីត្រឹមត្រូវមានចំនួន៩៩៩អាជីវកម្ម មានបុគ្គលិកបំរើការងារ​សេដ្ឋកិច្ចក្រៅប្រព័ន្ធ មានប្រមាណជាង ២ម៉ឺន៨៣០៦នាក់ ក្នុងនោះបុគ្គលិកនារី ១ម៉ឺន៩២៨៦នាក់ ។

បន្ថែមលើនេះ ឯកឧត្តម ថេង បញ្ញាធន ប្រតិភូរាជរដ្ឋាភិបាលទទួលបន្ទុក ជាអគ្គនាយកផែនការ នៃក្រសួងផែនការបានលើកឡើងថា ក្រសួងផែនការ នឹងចាប់ផ្ដើមយុទ្ធនាការចុះកំណត់​អត្តសញ្ញាណគ្រួសារក្រីក្រ សម្រាប់អ្នកធ្វើការសេដ្ឋកិច្ចក្រៅប្រព័ន្ធតាមអាជីវកម្ម​សេវាកម្សាន្ត​នានាបន្ថែមទៀត ក្នុងអំឡុងខែកក្តដានេះ ដើម្បីឲ្យគាត់ឈានទៅទទួលបានប័ណ្ណមូលនិធិសមធម៌សុខាភិបាលនេះផងដែរ។

ចំពោះអ្នកខកខានក្នុងការសម្ភាសនៅក្នុងយុទ្ធនាការនេះពួកគេ គឺអាចស្នើសុំការសម្ភាសនៅតាមឃុំ-សង្កាត់ដែលខ្លួនរស់នៅ រឺក៏អាចដាក់ពាក្យស្នើសុំការសម្ភាស​តាមរយៈកម្មវិធីទូរស័ព្ទរបស់ក្រសួងផែនការ៕អត្ថបទ ស៊ុម សុខជា