ក្រុមអាជ្ញាធរ បាននិយាយកាលពីថ្ងៃចន្ទថា ព្យុះកួច និងព្យុះផ្គរន្ទះ បានបោកបក់លើតំបន់ Midwest និងតំបន់ ភាគខាងត្បូងសហរដ្ឋអាមេរិក បណ្តាលឲ្យផ្ទះសម្បែងប្រជាពលរដ្ឋរាប់សិបខ្នង រងការខូចខាត និងបានសម្លាប់មនុស្សយ៉ាងហោច ៣នាក់នៅរដ្ឋ Indiana និងរដ្ឋ Arkansas ។ 

សេវាកម្មឧតុនិយមជាតិសហរដ្ឋអាមេរិក បានរាយការណ៍ថា ព្យុះកួចជាច្រើន និងព្យុះខ្លាំង ត្រូវបានគេរាយការណ៍ថាបានកើតមានកាលពីថ្ងៃអាទិត្យនៅភាគកណ្តាលរដ្ឋ Indiana និងរដ្ឋ Arkansas ។ 

ក្រុមមន្រ្តីសង្រ្គោះបន្ទាន់ មកពីស្រុក Martin រដ្ឋ Indiana បានបញ្ជាក់ពីការស្លាប់មនុស្សម្នាក់នៅក្នុងស្រុករបស់ពួកគេ ។ លោក Cameron Wolf គឺជាប្រធានគ្រប់គ្រងការសង្រ្គោះបន្ទាន់ និយាយថា ភរិយារបស់ជនរងគ្រោះ ត្រូវបានដឹកតាមឧទ្ធម្ភាគចក្រទៅកាន់មន្ទីរពេទ្យ ។ ពួកគេរស់នៅក្នុងផ្ទះខ្ពស់សង់ពីឈើកម្ពស់ ២ជាន់ដែលត្រូវបានបំផ្លាញដោយសារព្យុះ ។ រឿងរ៉ាវលម្អិតបន្ថែមទៀត នៅមិនទាន់ដឹងភ្លាមៗនោះទេ ។ 

ដោយឡែក ការិយាល័យតម្រួតស្រុក Lonoke បញ្ជាក់ថា មនុស្ស ២នាក់ ត្រូវបានសម្លាប់ ពេលដែលដើមឈើបាក់សង្កត់លើផ្ទះមួយខ្នងស្ថិតក្នុងទីក្រុង Carlisle រដ្ឋ Arkansas ដោយសារតែព្យុះខ្លាំង កាលពីថ្ងៃអាទិត្យ៕