ក្រចេះ ៖ អ្នកវិជ្ជមានកូវីដ-១៩ ម្នាក់ បានជាសះស្បើយ និងត្រូវបានអនុញ្ញាតឲ្យត្រឡប់ទៅលំនៅឋានវិញ ដោយត្រូវបន្តធ្វើចត្តាឡីស័ករយៈពេល ១៤ថ្ងៃនៅផ្ទះ។​

អ្នកជំងឺកូវីដ-១៩រូបនេះ ឈ្មោះ ប៉ូវ សុនិកា ភេទស្រី អាយុ ២៣ឆ្នាំ មានទីលំនៅនៅភូមិចង្ហប ឃុំក្បាលដំរី ស្រុកសំបូរ ខេត្តក្រចេះ មានផ្ទុកជំងឺកូវីដ-១៩ កាលពីថ្ងៃទី ០៥ ខែឧសភាត្រូវបានក្រុមគ្រូពេទ្យព្យាបាលជាសះស្បើយ និងអនុញ្ញាតឲ្យត្រឡប់ទៅលំនៅឋានវិញ ដោយត្រូវបន្តធ្វើចត្តាឡីស័ករយៈពេល ១៤ថ្ងៃនៅផ្ទះ ។ នេះបើយោងតាមសេចក្តីជូនដំណឹងរបស់រដ្ឋបាលខេត្តក្រចេះ ចេញនៅថ្ងៃទី ១៤ ខែឧសភាស្ដីពីករណីជាសះស្បើយអ្នកជំងឺកូវីដ-១៩ ចំនួន ០១នាក់។ ដោយឡែក ចំពោះករណីអ្នកពាក់ព័ន្ធ មនុស្សប្រុសស្រីទាំង ១៤នាក់ ជាមួយឈ្មោះ ប៉ូវ សុនិកា ដែលបានបញ្ជូនមកកាន់មណ្ឌលធ្វើចត្តាឡីស័ក ឥឡូវត្រូវបានក្រុមគ្រូពេទ្យ អនុញ្ញាតអោយត្រឡប់ទៅលំនៅឋានរៀងៗខ្លួន ផងដែរ ។

យ៉ាងណាក៏ដោយអាជ្ញាធរខេត្តក្រចេះ នៅតែបន្តអំពាវនាវដល់ប្រជាពលរដ្ឋទូទាំងខេត្ត ត្រូវមានការប្រុងប្រយត្ន័ខ្ពស់ និងត្រូវតែអនុវត្តឲ្យបានខ្ជាប់ខ្ជួននូវវិធានការណ៍ ៣កុំ និង ៣ការពារ ទាំងអស់គ្នា ។ សូមបញ្ជាក់ថា សម្រាប់ខេត្តក្រចេះ ករណីជាសះស្បើយជំងឺកូវីដ-១៩ គិតត្រឹម ថ្ងៃទី ១៤ ខែឧសភាគឺជាសះស្បើយសរុបចំនួន ៤ករណីហើយ លើ ៥ករណី ក្នុងព្រឹត្តិការណ៍សហគមន៍២០កុម្ភៈ ៕ អត្ថបទ ៖ សេង ម័រ