មន្ត្រីនគរបាលជាន់ខ្ពស់មួយរូប បាននិយាយ នៅថ្ងៃអង្គារ (ទី៤ ខែកក្កដា) ថា សមាជិក ១០នាក់នៃគ្រួសារតែមួយ ត្រូវបានទឹកហូរនាំទៅ ក្នុងទន្លេដែលមានទឹកឡើងខ្លាំងភ្លាមៗ នៅប្រទេសម៉ាឡេស៊ី ដោយសាកសពចំនួន ៧នាក់ ត្រូវបានរកឃើញនៅចម្ងាយមិនដល់ ២៥គីឡូម៉ែត្រពីកន្លែង ដែលពួកគេបានហែលទឹកលេង។

សោកនាដកម្មនេះបានកើតឡើង កាលពីថ្ងៃសុក្រសប្តាហ៍មុន នៅទឹកជ្រោះ Jeram Mawar ដែលមានទីតាំងស្ថិតនៅក្នុងព្រៃយ៉ាងជ្រៅ ក្នុងស្រុក Chukai នៅភាគខាងកើតរដ្ឋ Terengganu។ មេនគរបាលក្នុងតំបន់ លោក Hanyan Ramlan បានប្រាប់សារព័ត៌មាន AFP ថា ជនរងគ្រោះ ៩នាក់ មានទំនាក់ទំនងជាមួយគ្នា ហើយម្នាក់ទៀតជាគូដណ្តឹងនឹងគ្នា។

លោក Hanyan បាននិយាយថា៖ «ខ្ញុំជឿថាពួកគេបានហែលទឹក នៅក្នុងទន្លេកាលពីថ្ងៃសុក្រ នៅពេលដែលទឹកបានឡើងភ្លាមៗ និងហូរនាំពួកគេទៅឆ្ងាយ។ ហេតុការណ៍នោះបានកើតឡើងយ៉ាងលឿន ហើយកម្រិតទឹកបានឡើងដល់ទៅ ៣ម៉ែត្រ។ ពួកគេត្រូវបានធ្វើឲ្យភ័យស្លន់ស្លោរឥតឧបមា»។

លោក Hanyan បានប្រាប់បន្ថែមថា ជនរងគ្រោះមានអាយុចន្លោះពី ៤ឆ្នាំ ទៅ ៤០ឆ្នាំ ហើយសាកសព ៧នាក់ ត្រូវបានរកឃើញនៅចម្ងាយប្រហែល ២៤គីឡូម៉ែត្រពីកន្លែងកើតហេតុនៃគ្រោះថ្នាក់នេះ៕