ឧត្តរមានជ័យ៖ ស្នងការដ្ឋាននគរបាលខេត្តឧត្តរមានជ័យ នាថ្ងៃទី៤កក្កដាម្សិលមិញនេះ បានបិទវគ្គបណ្តុះបណ្តាលស្តីពីជំនាញ​តួនាទីភារកិច្ចរបស់ប៉ុស្តិ៍នគរបាលរដ្ឋបាលក្នុងការអនុវត្តគោលនយោបាយភូមិឃុំសង្កាត់មាន​សុវត្ថិភាព និងការងារនគរបាល សហគមន៍ ។

ក្នុងនោះដែរឯកឧត្តម ប៉ែន កុសល្យ អភិបាលខេត្តឧត្តរមានជ័យ បានផ្តាំផ្ញើរដល់មន្រ្តីនគរបាល​ប៉ុស្តិ៍ទាំងអស់នៅទូទាំងខេត្តឧត្តរមានជ័យ ដែលទទួលបាន​វគ្គ​បណ្តុះបណ្តាល​ត្រូវយកចំណេះ និងជំនាញទាំងអស់នេះ​មកបម្រើការងារជូនប្រជាពលរដ្ឋឲ្យបានល្អប្រសើរ ក្នុងការងារមូលដ្ឋានរបស់ខ្លួនប្រកបដោយវិជ្ជាជីវៈ និងក្រមសីលធម៌ល្អ។

ឯកឧត្តម អភិបាលខេត្ត បានលើកឡើងទៀតថា វគ្គបណ្តុះបណ្តាលជូនដល់មន្រ្តីនគរបាលរដ្ឋ​បាល​ប៉ុស្តិ៍​ដែលបានបិទ​បញ្ចប់​នៅ​ពេលនេះគឺ​មានសារៈសំខាន់ខ្លាំងណាស់សម្រាប់មន្រ្តី​នគរបាលប៉ុស្តិ៍គ្រប់រូប ក្នុងការយកចំណេះដឹង ​ដើម្បីអនុវត្តបម្រើការងារក្នុង​ការផ្តល់​សេវា​សាធារណៈផ្សេងៗ ជូនដល់ប្រជាពលរដ្ឋក្នុងមូលដ្ឋានរបស់ខ្លួនប្រកបដោយកម្លាភាព និងប្រសិទ្ធភាពខ្ពស់ ។

ឯកឧត្តម បានបន្តថា គ្មាន​ហេតុការណ៍​ណាមួយបង្ករការកើតឡើងក្រៅពីក្នុងមូលដ្ឋាន​របស់ខ្លួន​នោះទេ​ដូច្នេះអស់លោកដែលជាអាជ្ញាធរ និងមន្រ្តីនគរបាលប៉ុស្តិ៍នៅ​តាមមូលដ្ឋានទាំង​អស់​ត្រូវចេះ​សហការសាមក្គីគ្នាឲ្យបានល្អប្រសើរ ក្នុងការផ្តល់ព័ត៌មានឲ្យគ្នានៅ​ពេលមាន​បញ្ហាប្រឈម​ណាមួយ​បានកើតឡើងក្នុងមូលដ្ឋាន របស់បងប្អូនងាយស្រួល​ក្នុង​ការ​ទំនាក់ទំនង​បង្រ្កាប​ទប់ស្កាត់​បានទាន់ពេលវេលាផងដែរ។ ជាមួយគ្នានោះដែរ​ ឯកឧត្តមអភិបាលខេត្ត ក៏បានប្រគល់ និងផ្តល់​បណ្ណ​សរសើរ​ដល់​មន្រ្តីនគរបាល​ប៉ុស្តិ៍​ដែល​ជា​សិក្ខាកាមចំនួន៨៣នាក់ ​ក្នុងនោះស្រី១៩នាក់ ដែលបានបញ្ចប់វគ្គសិក្សារយៈពេលខ្លី៕