លោកប្រធានាធិបតីអ៊ុយរុយហ្គាយ Luis Lacalle Pou បានប្រាប់មេដឹកនាំ ក្រុមចតុភាគីប្រទេស Mercosur កាលពីថ្ងៃអង្គារ (ទី៤ ខែកក្កដា)ថា ប្លុកនេះ គួរតែបញ្ជូន «សញ្ញាច្បាស់លាស់» ទៅកាន់ប្រទេសវ៉េណេហ្ស៊ុយអេឡា បន្ទាប់ពីរដ្ឋាភិបាលរបស់ខ្លួន បានហាមឃាត់​ឥស្សរជន​ប្រឆាំងឈានមុខគេមិនឲ្យចូលរួមក្នុងកាបោះឆ្នោត។

អតីតសមាជិកសភាលោកស្រី Maria Corina Machado ត្រូវបានរារាំងរយៈពេល ១៥ឆ្នាំ កាលពីថ្ងៃទី៣០ ខែមិថុនា ជុំវិញការគាំទ្រទណ្ឌកម្មរបស់សហរដ្ឋអាមេរិក​មកលើរដ្ឋាភិបាល​លោកម៉ាឌូរ៉ូ (Maduro) និងការគាំទ្រអតីតមេដឹកនាំបក្សប្រឆាំង វ៉ាន់ ហ្ក្វៃដូ (Juan Guaido)។

លោកLacalle Pou បានប្រាប់ប្លុកពាណិជ្ជកម្មដែលបង្កើតឡើងដោយប្រទេសប្រេស៊ីល ​អាហ្សង់ទីន ប៉ារ៉ាហ្គាយ​ និងអ៊ុយរុយហ្គាយថា ​វ៉េណេហ្ស៊ុយអេឡា ​នឹងមិនក្លាយជាប្រជាធិបតេយ្យពេញលេញទេ ប្រសិនបើខ្លួន​ នៅតែបន្តហាមឃាត់ក្រុមឥស្សរជនប្រឆាំងនោះ។

យោងតាមការស្ទង់មតិ លោកស្រី Machado ​គឺជាឥស្សរជននាំមុខគេនៅក្នុងក្រុមប្រឆាំង នៅ​មុនការបោះឆ្នោតបឋម ដើម្បីជ្រើសរើសបេក្ខភាព១រូប ​ដើម្បីដណ្តើមតំណែងលោកប្រធានាធិបតី នីកូឡាស ម៉ាឌូរ៉ូ (Nicolas Maduro) នៅក្នុងការបោះឆ្នោតឆ្នាំ២០២៤។