ប្រទេសកាតេម៉ាឡា កាលពីថ្ងៃអង្គារ (ទី៤ ខែកក្កដា) បានចាប់ផ្តើមពិនិត្យសន្លឹកឆ្នោតឡើងវិញ សម្រាប់ការបោះឆ្នោតប្រធានាធិបតីជុំទី១ បន្ទាប់ពីគណបក្សនាំមុខគេ និងសម្ព័ន្ធមិត្ត បានជំទាស់តវ៉ាចំពោះលទ្ធផល ដោយបង្កើតបាននូវលទ្ធភាពសម្រាប់ការរាប់ឡើងវិញ នៅមុនការបោះឆ្នោតជុំទី២។

តុលាការកំពូលប្រទេសកាតេម៉ាឡា កាលពីថ្ងៃសៅរ៍ (ទី១ ខែកក្កដា) បានបញ្ជាឲ្យពិនិត្យ និងផ្ទៀងផ្ទាត់សន្លឹកឆ្នោតឡើងវិញ ហើយថា សន្លឹកឆ្នោតទាំងនោះ ត្រូវបានត្រួតពិនិត្យផ្ទុយនឹងប្រព័ន្ធរាប់សន្លឹកឆ្នោត។

ជាមួយគ្នានេះ តុលាការបានសង្កត់ធ្ងន់ថា ខ្លួននឹងផ្អាកដំណើរការបោះឆ្នោត នៅប្រទេសអាមេរិកកណ្តាល រហូតទាល់តែសន្លឹកឆ្នោតត្រូវបានពិនិត្យឡើងវិញ ដោយចាត់វិធានការតាមសំណើពីគណបក្សរបស់បេក្ខជនដែលឈ្នះជុំទី១ គឺគណបក្សឯកភាពជាតិនៃក្តីសង្ឃឹម (National Unity of Hope) របស់លោកស្រី Sandra Torres គណបក្ស Vamos របស់លោកប្រធានាធិបតី Alejandro Giammattei និងក្រុមសម្ព័ន្ធមិត្តជាច្រើនផ្សេងទៀត។

អតីតជំទាវទី១ លោកស្រី Torres នឹងត្រៀមប្រឈមក្នុងការបោះឆ្នោតជុំទី២ នៅថ្ងៃទី២០ ខែសីហា ទល់នឹងបេក្ខជនប្រឆាំងអំពើពុករលួយ លោក Bernardo Arevalo ដែលផ្ទុយនឹងការព្យាករណ៍ថា នឹងក្លាយជាអ្នកឈ្នះលំដាប់ទី២ ខណៈដែលកំហឹងនៃរឿងអាស្រូវពុករលួយជាច្រើនឆ្នាំ បានគ្របលើអារម្មណ៍អ្នកបោះឆ្នោត។

យ៉ាងណាក្ដី បើយោងតាមសេចក្តីថ្លែងការណ៍ដែលលោកស្រី Torres បានបង្ហោះលើបណ្ដាញសង្គម Twitter បានឲ្យដឹងថា បើទោះបីជាសុំឲ្យមានការពិនិត្យឡើងវិញមែន តែគណបក្សរបស់លោកស្រី មិនចង់ឲ្យការបោះឆ្នោត ត្រូវលុបចោលនោះទេ គឺគ្រាន់តែចង់ឲ្យមានការពិនិត្យដោយយុត្តិធម៌នៃការបោះឆ្នោតជុំដំបូងនេះប៉ុណ្ណោះ៕