ភ្នំពេញ៖ ប្រជាពលរដ្ឋ បានបង្ហាញនូវការគាំទ្រ ចំពោះចំណាត់ការរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឆ្លើយតបទៅនឹងភាពជ្រៀតជ្រែករបស់ក្រុមហ៊ុនហ្វេសប៊ុក ដើម្បីរក្សានូវស្ថិរភាពនយោបាយនៅកម្ពុជា ។

ប្រជាពលរដ្ឋ បានលើកឡើងថា ជាការសមហេតុសមផលណាស់ ដែលរាជរដ្ឋាភិបាលបានបណ្ដេញបុគ្គលិកទាំង២២នាក់ របស់ក្រុមហ៊ុនហ្វេសប៊ុកពីកម្ពុជា និងបានហាមមិនឲ្យចូលកម្ពុជាអស់មួយជីវិត ព្រោះពួកគេបានអនុវត្តហាក់ដូចជាមានភាពលម្អៀង ទៅលើការបញ្ចេញមតិរបស់អ្នកប្រើប្រាស់ ហើយការឆ្លើយតបរបស់សម្ដេចតេជោនេះ គឺគិតផលប្រយោជន៍ជាតិ​​ និងប្រជាពលរដ្ឋនៅទូទាំងប្រទេសជាធំ ។

ប្រជាពលរដ្ឋបានបន្តថា ដូចករណីក្រុមទណ្ឌិតក្បត់ជាតិ សមរង្ស៊ី បានប្រព្រឹត្តិខុសច្បាប់កម្ពុជា តាមរយៈការញុះញង់កងកម្លាំង ឲ្យបែរចុងកាណុងប្រឆាំងរាជរដ្ឋាភិបាលស្របច្បាប់ ឬការធ្វើរដ្ឋប្រហារ និងតែងតែប្រមាថអង្គព្រះមហាក្សត្រជាញឹកញាប់ ប៉ុន្តែក្រុមហ៊ុនមានដើម​កំណើត​នៅសហរដ្ឋអាមេរិកមួយនេះ​ មិនដែលព្រមាន​ពួកគេនោះទេ បានបណ្ដែតបណ្ដោយ​ឲ្យពួកនោះ មានសិទ្ធិញុះញង់ ​និងបំផុសបំផុលពលរដ្ឋឲ្យប្រព្រឹត្តិបទល្មើសផ្សេងៗ តាម​ប្រព័ន្ធហ្វេសប៊ុក តាមមហិច្ឆតារបស់ក្រុមអគតិទាំងនោះ ។

ជាមួយនេះពួកគាត់ ក៏បានសូមណូមពរដល់ពលរដ្ឋខ្មែរដទៃទៀត កុំធ្វើការចែកចាយនូវ​ព័ត៌មាន​មិនពិត ពាក់ព័ន្ធនឹងករណីប្រព័ន្ធហ្វេសប៊ុក ​និងអត្ថាធិប្បាយខុសការពិត និងសូមស្ដាប់​តាមអនុសាសន៍​របស់សម្ដេចតេជោ ​និងការបកស្រាយរបស់ក្រសួងស្ថាប័នពាក់ព័ន្ធ ហើយ​កុំបំភ្លៃខុសការពិត ​និងនាំឲ្យមានការយល់ច្រឡំ ។

គួរបញ្ជាក់ថា កាលពីម្សិលមិញ​ កម្ពុជាបានចេញសេចក្តីថ្លែងការណ៍​ ហាមឃាត់បុគ្គលចំនួន ២២នាក់ ជា​សមាជិកក្រុមប្រឹក្សាត្រួតពិនិត្យរបស់ក្រុមហ៊ុន Meta ​មិនឲ្យចូលកម្ពុជា បើមានអ្នក​កំពុងរស់​នៅកម្ពុជា ត្រូវចាកចេញបន្ទាន់ ក្នុងរយៈពេល៤៨ម៉ោង ៕ អត្ថបទ បាន សុខរិទ្ធិ