ភ្នំពេញ៖ គិតត្រឹមថ្ងៃទី៥ ខែកក្កដានេះ ជាថ្ងៃទី៥ដូចគ្នា នៃយុទ្ធនាឃោសនាបោះឆ្នោតជ្រើសរើសតំណាងរាស្រ្ត នីតិកាលទី៧។

ឯកឧត្តម ប៉ាន សូរស័ក្តិ បេក្ខជនតំណាងរាស្រ្តមណ្ឌលខេត្តកំពង់ចាម និងជាប្រធានក្រុមការងារគណបក្សចុះមូលដ្ឋានស្រុកព្រៃឈរ និងស្រុកបាធាយ បានបន្តចុះពន្យល់ណែនាំអំពីរបៀបគូសសន្លឹកឆ្នោតគាំទ្រគណបក្សប្រជាជនកម្ពុជា នៅក្នុងមូលដ្ឋាន។

ក្នុងកម្មវិធីនាឱកាសនោះ ឯកឧត្តមបានពាំនាំនូវការផ្ដាំផ្ញើការសួរសុខទុក្ខសំណាក់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ប្រធានកាកបាទ​ក្រហមកម្ពុជា ដែលសម្ដេចទាំងពីរតែងតែគិតគូរអំពីសុខទុក្ខ ព្រមទាំងតែងតែ​ណែនាំដល់ថ្នាក់ដឹកនាំ​គណបក្សប្រជាជនកម្ពុជាគ្រប់លំដាប់ថ្នាក់ ឱ្យយកចិត្តទុកដាក់គិតគូរបម្រើផលប្រយោជន៍បងប្អូន​ប្រជាពលរដ្ឋឱ្យបានល្អ និងដោយស្មោះត្រង់។

ឯកឧត្តម បានអាន និងបកស្រាយពន្យល់ម្ដងមួយៗអំពីខ្លឹមសាររបស់កម្មវិធី​នយោបាយរបស់​គណបក្សប្រជាជនកម្ពុជា ​និងការដាក់ចេញនូវកម្មវិធីគោលនយោបាយជាអាទិភាពចំនួន​ ៦ចំណុច នៅ​ក្នុងកម្មវិធីនយោបាយនេះ ​ជូនប្រជាពលរដ្ឋដែលបានចូលរួមទាំងអស់ ព្រមទាំងបានធ្វើការ​ណែនាំ​ជូនអំពីរបៀបគូសសន្លឹកឆ្នោតគាំទ្រគណបក្សប្រជាជនកម្ពុជាផងដែរ។

ជាមួយគ្នានេះ ឯកឧត្តម បានលើកឡើងនូវសមិទ្ធផលជាច្រើនជូនប្រជាពលរដ្ឋបានជ្រាប ជាពិសេស​ក្នុងមូលដ្ឋានស្រុកបាធាយផ្ទាល់ ដោយបាននាំមកនូវការអភិវឌ្ឍហេដ្ឋារចនាសម្ព័ន្ធ​ ផ្លូវ ស្ពាន អណ្ដូងទឹក ​ភ្លើងអគ្គិសនី​ រោងចក្រកសិដ្ឋាន សាលារៀន ​មន្ទីរពេទ្យ វត្តអារាម។ល។

ឯកឧត្តម ​បានអំពាវនាវឲ្យពលរដ្ឋ និងសមាជិក សមាជិកាទាំងអស់ ចូលរួមបោះឆ្នោតឲ្យបាន​គ្រប់ៗគ្នាកុំបីខាន ​នៅថ្ងៃទី២៣​ ខែកក្កដា​ ឆ្នាំ២០២៣ខាងមុខនេះ ហើយត្រូវបោះឆ្នោតជូនគណបក្ស​ប្រជាជនកម្ពុជា ដែលមាន ​លេខរៀងទី១៨ ដើម្បីរក្សាសុខសន្តិភាព ការអភិវឌ្ឍ និងភាពរីកចម្រើន​បន្តទៀត។

លើសពីនេះ សូមបង្ហាញនូវការគាំទ្រយ៉ាងពេញទំហឹងចំពោះ សម្តេចតេជោ ហ៊ុន សែន ជាបេក្ខភាព​នាយករដ្ឋមន្រ្តី សម្រាប់នីតិកាលទី៧ និងគាំទ្រ ​ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តី​សម្រាប់ពេលអនាគត៕