ភ្នំពេញ៖ ក្រុមយុវជន សមាជិក សមាជិកា គណបក្សប្រជាជនកម្ពុជា នៅព្រឹកថ្ងៃទី៥ ខែកក្កដា ឆ្នាំ២០២៣នេះ បានចុះផ្សព្វផ្សាយកម្មវិធីនយោបាយ និងរបៀបគូសសន្លឹកឆ្នោត តាមខ្នងផ្ទះប្រជាពលរដ្ឋ ស្ថិតនៅសង្កាត់ទឹកល្អក់១ ខណ្ឌទួលគោក រាជធានីភ្នំពេញ។

លោក អោ វិទូ អនុប្រធានលេខាធិការដ្ឋានក្រុមការងារចុះជួយសង្កាត់ទឹកល្អក់ទី១ ខណ្ឌទួលគោក ប្រាប់ BTV ព័ត៌មាន នាថ្ងៃនេះថា ក្រុមការងារ រួមជាមួយសមាជិក សមាជិកគណបក្សប្រជាជនកម្ពុជា ប្រចាំសង្កាត់ បានចុះតាមមូលដ្ឋានខ្នងផ្ទះរស់នៅរបស់ប្រជាពលរដ្ឋ ដើរពីផ្ទះមួយទៅផ្ទះមួយ ដើម្បីចុះបង្រៀន និងណែនាំជូនបងប្អូនប្រជាពលរដ្ឋ ដែលមានកាតព្វកិច្ចសំខាន់បំផុតសម្រាប់ប្រទេសជាតិ នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ត្រូវចូលរួមបោះឆ្នោតថ្នាក់ជាតិ។ ក្នុងសកម្មភាពនាថ្ងៃនេះ ប្រជាពលរដ្ឋ មានការស្វាគមន៍គាំទ្រជាខ្លាំង មកលើគណបក្សប្រជាជនកម្ពុជា ជាពិសេសសម្តេចតេជោ ដែលមានលេខរៀងទី១៨។

ប្រជាពលរដ្ឋ រួមនឹងសមាជិកបក្ស នៅក្នុងមូលដ្ឋានសង្កាត់ទឹកល្អក់ទី១ លើកឡើងថា ក្នុងនាមជាប្រជាពលរដ្ឋ មានកាតព្វកិច្ចនឹងទៅបោះឆ្នោតជូនជាតិ មាតុភូមិ។ ពលរដ្ឋបានបង្ហាញកី្តស្រឡាញ់ជូនចំពោះសម្តេចតេជោ ហ៊ុន សែន ធ្វើជានាយករដ្ឋមន្រ្ដីសម្រាប់អាណត្តិទី៧នេះបន្តទៀត។

លោក អោ វិទូ បានថ្លែងអំណរគុណដល់ ប្រជាពលរដ្ឋ ដែលបានរួមគ្នាថែរក្សាសុខសន្ដិភាព និងជឿជាក់លើការដឹកនាំរបស់គណបក្សប្រជាជនកម្ពុជា ក្រោមការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្រ្ដីនៃកម្ពុជា៕អត្ថបទ រដ្ឋា