​ជប៉ុន៖ ញត្តិ​ធ្វើឡើង​តាម​ប្រព័ន្ធ​អ៊ីនធឺណិត​ ដែល​អំពាវនាវ​ឱ្យ​លុបចោល​ការប្រកួត​កីឡា​អូឡាំពិក​ក្រុង​តូ​ក្យូ ​ត្រូវ​បាន​បញ្ជូន​ទៅ​រដ្ឋាភិបាល​ទីក្រុង​តូ​ក្យូ ​ដោយមាន​ហត្ថលេខា​ជាង ៣៥​ម៉ឺន​នាក់​។ ការ​ដាក់​ញត្តិ​នេះ​ធ្វើឡើង​ ខណៈ​ដែល​ទីក្រុង​តូ​ក្យូ​, អូ​សា​កា ​និង​តំបន់​ជាច្រើន​ទៀត​ស្ថិត​ក្នុង​ស្ថានភាព​រដ្ឋ​ក្នុង​គ្រា​អាសន្ន ដោយ​ការ​ឆ្លង​មេរោគ​កូ​រ៉ូ​ណា​កំពុង​កើន​ឡើង ជាពិសេស​ប្រភេទ​ថ្មី​នៃ​មេរោគ​ប​ម្លែ​ង​ខ្លួន​។

រដ្ឋ​ក្នុង​គ្រាអាសន្ន​នឹង​ត្រូវ​ផុត​កំណត់​នៅ​ថ្ងៃ​ទី​៣១ ខែ​ឧសភា ប៉ុន្តែ​ត្រូវ​បាន​រំពឹង​ថានឹង​បន្ថែម​ទៅ​ខេត្ត​ផ្សេងទៀត​នៅក្នុងប្រទេស​។ ព្រឹត្តិការណ៍​កីឡា​អូឡាំពិកដែល​ត្រូវបាន​ពន្យារពេល នឹង​ត្រូវ​ធ្វើពិធីបើកនៅ​ថ្ងៃ​ទី​២៣ ខែ​កក្កដា​ខាងមុខ​។ ញត្តិ​នេះនឹង​ត្រូវ​បញ្ជូន​ទៅ​ប្រធាន​គណៈកម្មាធិការ​កីឡា​អូឡាំពិកអន្តរជាតិ លោក Thomas Bach ដែល​បាន​លុបចោល​ផែនការ​ធ្វើ​ដំណើរ​ទៅ​ប្រទេស​ជប៉ុន​ក្នុង​ខែ​នេះ ដោយសារតែ​ករណីកើនឡើង​នៃ​ជំងឺ​កូ​វីដ-19 នៅ​ក្នុង​ប្រទេស និង​ផ្ញើ​ទៅ​ប្រធាន​គណៈកម្មាធិការកីឡា​ប៉ា​រ៉ា​ឡាំ​ពិ​ក​អន្តរជាតិ លោក Andrew Parsons។ ទោះបីជា​ប្រជាជន​ជប៉ុន ៧០-៨០​% នៅ​ក្នុង​ការស្ទង់មតិ​និយាយ​ថា ​ពួកគេ​ចង់​ឲ្យ​លុបចោល​ការប្រកួត​កីឡា​អូឡាំពិក ឬ​ពន្យារពេល​។

នាយករដ្ឋមន្ត្រី​ជប៉ុន លោក Yoshihide Suga, ប្រធាន​គណៈកម្មាធិការ​រៀបចំ​ទីក្រុង​តូ​ក្យូ លោក Seiko Hashimoto និង​លោក Bach បាន​និយាយ​ម្តង​ហើយ​ម្តង​ទៀត​ថា ការប្រកួត​កីឡា​នឹង​បន្ត​ដូច​ការ​គ្រោង​ទុក​។ ញត្តិ​នេះ​ត្រូវ​បាន​រៀបចំឡើង​ដោយ​​លោក Kenji Utsunomiya មេធាវី​ដែល​បាន​ឈរ​ឈ្មោះ​ជាច្រើន​ដង ​សម្រាប់​តំណែង​អភិបាលក្រុង​តូ​ក្យូ​។ ញត្តិ​បាន​ចុះហត្ថលេខាប្រមាណ ៥​ម៉ឺន​នាក់​ក្នុង​រយៈពេល ២៤​ម៉ោង​ដំបូង បន្ទាប់ពី​ត្រូវ​បាន​ដាក់​ឱ្យ​ដំណើរការ​នៅ​ថ្ងៃ​ទី​៥ ខែ​ឧសភា​។ លោក Utsunomiya បាន​និយាយ​ថា អត្ត​ព​លិ​ក​គឺជា​ជន​រង​គ្រោះ​នៅ​ទី​នេះ ហើយ​រដ្ឋាភិ​បាល​ទីក្រុង​តូ​ក្យូ និង​រដ្ឋាភិបាល​ជប៉ុន​គួរតែ​សម្រេចចិត្ត​លុបចោល​ការប្រកួត​កីឡា​៕

អត្ថបទ៖ ប៊ុនថន