ប្រធានាធិបតីអ៊ីរ៉ង់ លោក Ebrahim Raisi បាននិយាយកាលពីថ្ងៃអង្គារថា ប្រទេសអ៊ីរ៉ង់គាំទ្រគំនិតផ្តួចផ្តើមពហុភាគីប្រកបដោយការស្ថាបនា ហើយមានឆន្ទៈក្នុងការអនុវត្តកិច្ចសហប្រតិបត្តិការទូលំទូលាយនៅក្នុងក្របខ័ណ្ឌនៃអង្គការសហប្រតិបត្តិការសៀងហៃ (SCO) ដែលប្រទេសអ៊ីរ៉ង់ទើបតែបានយល់ព្រម។

សមាជិកភាពពេញសិទ្ធរបស់អ៊ីរ៉ង់ត្រូវបានអនុម័តនៅក្នុងកិច្ចប្រជុំលើកទី២៣ នៃក្រុមប្រឹក្សាប្រមុខរដ្ឋអង្គការ SCO ដែលធ្វើឡើងតាមរយៈសន្និសីទវីដេអូកាលពីថ្ងៃអង្គារ នេះបើយោងតាមសេចក្តីថ្លែងការណ៍ដែលចេញផ្សាយដោយការិយាល័យប្រធានាធិបតីអ៊ីរ៉ង់នៅលើគេហទំព័រផ្លូវការរបស់ខ្លួន។

នៅក្នុងសុន្ទរកថារបស់លោក Raisi ទៅកាន់កិច្ចប្រជុំកំពូលដែលធ្វើឡើងពីទីក្រុងតេអេរ៉ង់ លោកបាននិយាយថា អង្គការ SCO ឆ្លុះបញ្ចាំងពីសណ្តាប់ធ្នាប់ក្នុងតំបន់ដោយយុត្តិធម៌ និងមានសក្តានុពលធំធេងនៃកិច្ចសហប្រតិបត្តិការ។

លោក Raisi ក៏បាននិយាយផងដែរថា លោកស្វាគមន៍ចំពោះការទទួលយកឧបករណ៍ទូទាត់ក្នុងក្របខ័ណ្ឌពហុភាគីសម្រាប់ការពង្រីកការប្រើប្រាស់រូបិយប័ណ្ណផ្ទាល់ខ្លួនរបស់រដ្ឋជាសមាជិកអង្គការ SCO ក្នុងការដោះដូរពាណិជ្ជកម្ម និងហិរញ្ញវត្ថុអន្តរជាតិ ដើម្បីប្រឆាំងនឹងទង្វើរបស់ប្រទេសលោកខាងលិចដែលប្រើប្រាស់ប្រាក់ដុល្លារអាមេរិកជាឧបករណ៍ក្នុងបំណងពង្រីកអនុត្តរភាពរបស់ពួកគេ៕