ភាពរំភើបនៅសួនកម្សាន្តនៅតំបន់ Forest County របស់រដ្ឋ Wisconsin សហរដ្ឋអាមេរិក បានប្រែក្លាយទៅជាដំណើរផ្សងព្រេងដែលមិននឹកស្មានដល់កាលពីថ្ងៃអាទិត្យ (២ កក្កដា) នៅពេលការជិះរថភ្លើងហោះសម្រាប់កម្សាន្តមួយបានដំណើរការខុសប្រក្រតី បណ្តាលឱ្យអ្នកដំណើរប្រាំបីនាក់ត្រូវជាប់គាំងនៅលើអាកាសដាំក្បាលចុះក្រោមអស់ជាច្រើនម៉ោង។

នាយកដ្ឋានពន្លត់អគ្គីភ័យទីក្រុង Crandon បានរាយការណ៍ថាការបរាជ័យផ្នែកមេកានិចបណ្តាលឱ្យរថភ្លើងហោះនោះ បានជាប់គាំងនៅក្នុងទីតាំងបញ្ឈរឡើងលើ។ វីដេអូដែលចែកចាយនៅលើប្រព័ន្ធផ្សព្វផ្សាយសង្គមថតបាន ខណៈពេលដែលក្រុមសង្គ្រោះបានឡើងលើផ្នែកម្ខាងនៃរថភ្លើងហោះនោះដោយគ្មានចលនា ហើយអ្នកដំណើរកំពុងរង់ចាំការសង្គ្រោះយ៉ាងអន្ទះសារ ខណៈជាប់គាំងនៅកណ្តាលផ្នែករង្វិលជុំដ៏ធំនៃផ្លូវរថភ្លើងនោះ។

ដោយសារតែកម្ពស់របស់រថភ្លើងនោះ ឧបករណ៍ជំនាញ និងក្រុមសង្គ្រោះបន្ថែមត្រូវបានកោះហៅទៅកាន់ទីតាំងកើតហេតុ ដូចដែលបានលើកឡើងនៅក្នុងសេចក្តីប្រកាសព័ត៌មានរួម ដែលចេញដោយនាយកដ្ឋានពន្លត់អគ្គិភ័យ និងក្រុមជួយសង្គ្រោះទីក្រុង Crandon។

ក្រុមអ្នកពន្លត់អគ្គិភ័យមកពីទីក្រុងចំនួនបីបានចូលរួមជាមួយនាយកដ្ឋានពន្លត់អគ្គិភ័យទីក្រុង Crandon ដើម្បីរៀបចំបេសកកម្មជួយសង្គ្រោះដ៏ស្មុគស្មាញនេះ។ ជិតពីរម៉ោងបន្ទាប់ពីក្រុមសង្គ្រោះបន្ទាន់ត្រូវបានបញ្ជូនទៅ អ្នកដំណើរទីមួយត្រូវបានគេនាំត្រឡប់ចុះមកវិញដោយសុវត្ថិភាព។ ចំណែកអ្នកដំណើរចុងក្រោយ ក៏ត្រូវបានជួយសង្គ្រោះដោយជោគជ័យរយៈពេលជាងបីម៉ោងបន្ទាប់ពីរថភ្លើងហោះនោះជាប់គាំង៕