សម្ព័ន្ធអារ៉ាប់បានបើកកិច្ចប្រជុំបន្ទាន់មួយកាលពីថ្ងៃអង្គារដើម្បីពិភាក្សាអំពីការវាយប្រហាររបស់អ៊ីស្រាអែលនៅភាគខាងជើងទីក្រុងជេនីន (Jenin) ភាគខាងលិច។ ការវាយឆ្មក់នេះបានធ្វើឱ្យជនជាតិប៉ាឡេស្ទីនដប់នាក់ស្លាប់ និងប្រហែល ១០០នាក់ទៀតរងរបួស ព្រមទាំងមនុស្ស២០នាក់ស្ថិតក្នុងស្ថានភាពធ្ងន់ធ្ងរ នេះបើយោងតាមក្រសួងសុខាភិបាលប៉ាឡេស្ទីន។

កិច្ចប្រជុំនោះបានចេញសេចក្តីថ្លែងការណ៍មួយដោយនិយាយថា បញ្ហាប៉ាឡេស្ទីនតែងតែជាស្នូលសំខាន់នៃបណ្តាប្រទេសអារ៉ាប់ ហើយបណ្តាប្រទេសអារ៉ាប់នឹងរួមគ្នាគាំទ្រសិទ្ធិដែលមិនអាចកាត់ផ្តាច់បានរបស់ប្រជាជនប៉ាឡេស្ទីន។

សេចក្តីថ្លែងការណ៍នោះបានរំលឹកឡើងវិញនូវការគាំទ្ររបស់អារ៉ាប់ចំពោះការបង្កើតរដ្ឋឯករាជ្យមួយរបស់ប៉ាឡេស្ទីន ដោយផ្អែកលើព្រំដែនឆ្នាំ១៩៦៧ ដោយមានទីក្រុងហ្សេរុយសាឡឹមខាងកើតជារដ្ឋធានីរបស់ខ្លួន ហើយបានអំពាវនាវឱ្យផ្តល់សមាជិកភាពពេញលេញដល់ប៉ាឡេស្ទីនក្នុងអង្គការសហប្រជាជាតិ។ សេចក្តីថ្លែងការណ៍នោះក៏បានជំរុញសហគមន៍អន្តរជាតិផងដែរឱ្យចាត់វិធានការដើម្បីបញ្ឈប់ការឈ្លានពានរបស់អ៊ីស្រាអែល និងស្នើសុំការការពារអន្តរជាតិសម្រាប់ប្រជាជនប៉ាឡេស្ទីន។

ប្រតិបត្តិការរបស់អ៊ីស្រាអែលនៅទីក្រុងជេនីន បណ្ដាឲ្យមនុស្សរាប់ពាន់នាក់ភៀសខ្លួនចេញពីជំរំប៉ាឡេស្ទីន និងស្វែងរកការជ្រកកោនឆ្ងាយពីជំរំនោះ។ ប្រធានអាជ្ញាធរប៉ាឡេស្ទីនលោក Mahmoud Abbas បានសម្រេចផ្អាករាល់ទំនាក់ទំនង កិច្ចប្រជុំ និងការសម្របសម្រួលសន្តិសុខជាមួយអ៊ីស្រាអែល ដោយសារតែការវាយលុករបស់ពួកគេ៕