ភ្នំពេញ៖ ឯកឧត្តម ប្រាក់ សុខុន ប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកស្អាង ខេត្តកណ្ដាល បានថ្លែងថា គណបក្សប្រជាជនកម្ពុជា ហ៊ានថា ហ៊ានធ្វើ ហ៊ានទទួលខុសត្រូវ។ ការថ្លែងបែបនេះ ធ្វើឡើងចំពោះមុខសមាជិកសមាជិកា គណបក្សប្រជាជមកម្ពុជា ក្នុងឃុំក្រាំងយ៉ូវ ស្រុកស្អាង ខេត្តកណ្ដាល។

ឯកឧត្តម ប្រាក់ សុខុន ប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកស្អាង នាព្រឹកថ្ងៃទី ៦ ខែកក្កដា ឆ្នាំ ២០២៣ បានចុះជួបសំណេះសំណាលជាមួយ សកម្មជន និងសមាជិក សមាជិកា គណបក្សប្រជាជនកម្ពុជា ប្រចាំឃុំក្រាំងយ៉ូវ ស្រុកស្អាង ខេត្តកណ្ដាល ប្រមាណជាង ៨០០នាក់ ព្រមទាំងបានថ្លែងអំណរគុណដល់ សមាជិក សមាជិកា និងប្រជាពលរដ្ឋទូទាំងឃុំ ដែលតែងតែគាំទ្រគណបក្សប្រជាជនកម្ពុជាតាំងពីដើមរៀងមក ។

ឯកឧត្តម ប្រាក់ សុខុន បានថ្លែងចំពោះមុខប្រជាពលរដ្ឋ ​និងសមាជិកគណបក្សប្រជាជនកម្ពុជា ទាំងថ្មីទាំងចាស់ថា គណបក្សប្រជាជនកម្ពុជា តែងតែយកចិត្តទុកដាក់ជាប់ជានិច្ចពីសុខទុក្ខ​របស់​ប្រជាពលរដ្ឋ និងបានជួយឱ្យមូលដ្ឋានមានការអភិវឌ្ឍ​ជាលំដាប់។

ឯកឧត្តមបានបញ្ជាក់ទៀតថា ​គណបក្សប្រជាជនកម្ពុជា ហ៊ានថា ហ៊ានធ្វើ និងហ៊ានទទួលខុសត្រូវ ពោលគឺនៅក្បែរប្រជាពលរដ្ឋជានិច្ច។

ឯកឧត្តម ទី សុគន្ធ ប្រធានក្រុមការងារគណបក្សប្រជាជនកម្ពុជា ចុះមូលដ្ឋាន ឃុំក្រាំងយ៉ូវ បានថ្លែងថា ពីមុនមូលដ្ឋានឃុំក្រាំងយ៉ូវនេះ ប្រជាពលរដ្ឋមានជីវភាពមិនសូវល្អប្រសើរប៉ុន្មានទេ ហើយក៏មិនមានហេដ្ឋារចនាសម្ព័ន្ធរីកចម្រើនដូចបច្ចុប្បន្ននេះដែរ។

ឯកឧត្តម បញ្ជាក់ថា រាល់សមិទ្ធផល ដែលកើតមាននៅក្នុងមូលដ្ឋាននេះ គឺកើតចេញពីការ​ដឹកនាំ​របស់គណបក្សប្រជាជនកម្ពុជា ​ដែលប្រជាពលរដ្ឋបោះឆ្នោតគាំទ្រ​ ពោលគឺចាប់តាំងពីឆ្នាំ ១៩៩៨ មក គណបក្សប្រជាជនកម្ពុជា ក្នុងឃុំក្រាំងយ៉ូវនេះគឺឈ្នះឆ្នោតជាប្រចាំ។

ប្រជាពលរដ្ឋ និងជាសមាជិកគណបក្សប្រជាជនកម្ពុជាប្រចាំមូលដ្ឋានខាងនេះ ក៏បានបង្ហាញការកត់​សម្គាល់ថា ជារួមសមិទ្ធផលជាច្រើនដែលកើតមានក្នុងមូលដ្ឋានដែលពួកគាត់រស់នៅ គឺ​សុទ្ធសឹង​ជាការផ្ដល់ជូនពីគណបក្សប្រជាជនកម្ពុជា​ ដែលកំពុងដឹកនាំរដ្ឋាភិបាលសព្វថ្ងៃ។

ក្នុងឱកាសនោះដែរ ឯកឧត្តម ប្រាក់ សុខុន ប្រធានក្រុមការងារគណបក្ស​ប្រជាជនកម្ពុជា​ចុះមូលដ្ឋានស្រុកស្អាង ខេត្តកណ្ដាល​ ក៏បានចុះសាកសួរសុខទុក្ខ ​បងប្អូនប្រជាពលរដ្ឋ និង​សមាជិកបក្ស តាមខ្នងផ្ទះ ប្រកបដោយកាយវិការយ៉ាងសមញ្ញ និងភាពកក់ក្ដៅ ក្នុងនាម​ជា​អាណាព្យាបាល​ប្រចាំមូលដ្ឋានខាងលើនេះ។

ជាមួយគ្នានេះ ឯកឧត្តម ​ក៏បានអំពាវនាវឱ្យប្រជាពលរដ្ឋដែលគ្រប់អាយុបោះឆ្នោត​អញ្ជើញទៅ​បោះឆ្នោតជូនគណបក្សប្រជាជមកម្ពុជា ​ដែលមាន​រូបទេវតា​បាចផ្កាជាសញ្ញា ​នៅលេខរៀងទី១៨ ដើម្បីបន្តគាំទ្រ​សម្ដេសតេជោ ហ៊ុន សែន ជានាយករដ្ឋមន្ត្រី និងគាំទ្រ ​ឯកឧត្តម ហ៊ុន ម៉ាណែត ជា​បេក្ខភាព​នាយករដ្ឋមន្ត្រីបន្តវេននាពេលអនាគត និង​ដើម្បីជ្រើសរើស​មេដឹកនាំដែលធ្វើឱ្យ​ប្រទេសជាតិ​មានសុខសន្តិភាព និងការអភិវឌ្ឍ៕ អត្ថបទ៖ ចេន សុជាត