ភ្នំពេញ៖ ឯកឧត្តម ប៊ិន ស៊ីនាថ ជំនួយការសម្ដេចតេជោ និងជាអនុប្រធានក្រុមកាងារចុះមូលដ្ឋានសង្កាត់ព្រែកថ្មី ខណ្ឌច្បារអំពៅ បានអំពាវនាវទៅប្រជាពលរដ្ឋ ដែលមានឈ្មោះក្នុងបញ្ជីបោះឆ្នោត សូមសិក្សាឲ្យបានច្បាស់លាស់ ពីការគូសសន្លឹកឆ្នោតឲ្យបានត្រឹមត្រូវ និងយកជាការបាន ។

ក្នុងពេលចុះបង្រៀនពលរដ្ឋ ពីការគូសសន្លឹកឆ្នោត និងចែកខិតប័ណ្ណបោះឆ្នោត ដោយមានការចូលរួមពីលោក កៃ សន សមាជិកក្រុមការងារចុះជួយសង្កាត់ព្រែកថ្មី និងសមាជិកបក្ស នៅថ្ងៃទី៦ ខែកក្កដា ឆ្នាំ២០២៣នេះ ឯកឧត្តម ប៊ិន ស៊ីនាថ បានអំពាវនាវដល់ប្រជាពលរដ្ឋ ត្រូវត្រៀមឯកសារបោះឆ្នោតឲ្យបានរួចរាល់ តាមការតម្រូវ របស់​គណៈកម្មាធិការ​ជាតិ​រៀបចំ​ការបោះឆ្នោត (គ.ជ.ប) ហើយសូមទៅចូលរួមបោះឆ្នោត ឲ្យបានគ្រប់ៗគ្នា នៅថ្ងៃទី២៣ ខែកក្កដា ឆ្នាំ២០២៣​ខាងមុខ ។

ឯកឧត្តមបានបន្តថា ចំពោះការបោះឆ្នោតនេះ ក៏ត្រូវអនុវត្តឲ្យបានត្រឹមត្រូវផងដែរ នូវការគូសសន្លឹកឆ្នោត កុំឲ្យខុស​ពីអ្វីដែល គ.ជ.ប បានណែនាំ ដើម្បីកុំឲ្យសន្លឹកឆ្នោតនោះប្រើការមិនបាន ហើយចំពោះអ្នកទើប​មានឈ្មោះបោះឆ្នោត​ក្នុងអាណត្តិនេះ បើមានការមិនសូវយល់ ពីការគូសនេះ ត្រូវសួរនាំអ្នកធ្លាប់បានបោះឆ្នោតកន្លងមក ។

ជាមួយគ្នានេះ ឯកឧត្តមអនុប្រធានក្រុមការងារ បានជំរុញទៅពលរដ្ឋ ដែលបាត់ ឬខូចអត្តសញ្ញាណប័ណ្ណ សូមទៅរក​មន្ត្រី គ.ជ.ប តាមឃុំ-សង្កាត់ ដែលខ្លួនមានឈ្មោះបោះឆ្នោត ដើម្បីឲ្យមន្ត្រីទាំងអស់នោះ ជួយធ្វើលិខិតបញ្ជាក់ (ប័ណ្ណ អេ.អ) ដែលកាតនេះ អាចជំនួសអត្តសញ្ញាណប័ណ្ណ ហើយអាចមានសិទ្ធិបោះឆ្នោតបានផងដែរ ៕ អត្ថបទ៖ បាន សុខរិទ្ធិ