ប្រទេសចិន បានទទួលនាវាចម្បាំងរុស្ស៊ីពីរគ្រឿងដែលពេលដំបូងបានធ្វើដំណើរឆ្លងកាត់កោះតៃវ៉ាន់ និងប្រទេសជប៉ុន ហើយនាវាទាំងពីរគ្រឿងនេះ​ត្រូវបានគេរំពឹងថានឹង​ធ្វើសម​យុទ្ធរួម​គ្នា​ជាមួយ​កងទ័ពជើងទឹកចិន ក្នុងអំឡុងដំណើរទស្សនកិច្ចរបស់ពួកគេ ដែលបង្ហាញពីកិច្ចសហប្រតិបត្តិការយោធាយូរអង្វែងរវាងប្រទេសទាំងពីរ។ ទូរទស្សន៍រដ្ឋចិនបានរាយការណ៍ថា នាវាចម្បាំងពីរគ្រឿងមានឈ្មោះ Gromkiy និង Sovershenniy បានចូលមកកំពង់ផែនៅមជ្ឈមណ្ឌលហិរញ្ញវត្ថុទីក្រុងសៀងហៃ កាលពីថ្ងៃពុធ។ នាវាទាំងពីរគ្រឿងនេះ ជាកម្មសិទ្ធិរបស់កងនាវាប៉ាស៊ីហ្វិករបស់រុស្ស៊ី ដែលមានទីបញ្ជាកការនៅទីក្រុង Vladivostok ។

ក្នុងអំឡុងពេលដំណើរទស្សនកិច្ចរយៈពេល៧ថ្ងៃ នាវាទាំងនេះនឹងធ្វើសមយុទ្ធកងទ័ពជើងទឹកជាមួយកងទ័ពជើងទឹកចិននៅទីក្រុងសៀងហៃ ដែលនឹងរួមមានការអនុវត្តន៍លើសកម្មភាពអភិវឌ្ឍន៍ ការទំនាក់ទំនង និងការជួយសង្គ្រោះតាមសមុទ្រ។ នាវាដូចគ្នាដែលជាកម្មសិទ្ធិរបស់កងនាវាប៉ាស៊ីហ្វិកនៃកងទ័ពជើងទឹករុស្ស៊ី បានឆ្លងកាត់ដែនទឹកក្បែរកោះតៃវ៉ាន់កាលពីចុងខែមិថុនា។ ក្រោយមក ពួកគេបានបើកឆ្លងកាត់កោះអូគីណាវ៉ា របស់ប្រទេសជប៉ុន ជាទីតាំងមូលដ្ឋានយោធាសហរដ្ឋអាមេរិកធំ កាលពីដើមខែនេះ។ ការឆ្លងកាត់នេះ បានជំរុញឱ្យប្រទេសជប៉ុនបញ្ជូននាវាដើម្បីត្រួតពិនិត្យសកម្មភាពរបស់ពួកគេ ខណៈកោះតៃវ៉ាន់ ដែលប្រទេសចិនអះអាងសិទ្ធថាជាផ្នែកមួយនៃដែនដីរបស់ខ្លួន បានដាក់ពង្រាយយន្តហោះ និងនាវាដើម្បីឃ្លាំមើលការឆ្លងកាត់របស់ពួកគេ។

នៅចុងបញ្ចប់នៃដំណើរទស្សនកិច្ចរបស់ប្រធានាធិបតីចិនលោក Xi Jinping ទៅកាន់ទីក្រុងមូស្គូ សម្រាប់កិច្ចពិភាក្សាជាមួយប្រធានាធិបតីរុស្ស៊ី លោក Vladimir Putin កាលពីខែមីនា មេដឹកនាំទាំងពីរបានចេញសេចក្តីថ្លែងការណ៍រួម ដែលមានការចោទប្រកាន់ដូចគ្នាប្រឆាំងប្រទេសលោកខាងលិច ថាទីក្រុងវ៉ាស៊ីនតោន កំពុងធ្វើឱ្យអន្តរាយដល់ស្ថិរភាពពិភពលោក ហើយសម្ព័ន្ធយោធាណាតូ កំពុងរារាំងដល់តំបន់អាស៊ី-ប៉ាស៊ីហ្វិក។