រូបិយប័ណ្ណរបស់ប្រទេសរុស្ស៊ីបានធ្លាក់ចុះដល់កម្រិតទាប ក្នុងរយៈពេលជាង ១៥ខែកន្លងមកនេះ ដោយលើសពី ៩១រូប្លិ៍ ធៀបនឹងប្រាក់ដុល្លារអាមេរិក កាលពីថ្ងៃពុធ (ទី៥ ខែកក្កដា) ដែលជាធ្លាក់ចុះជិតដល់កម្រិត ៧ភាគរយ គិតចាប់តាំងពីការបះបោរប្រដាប់អាវុធ កាលពីចុងខែមិថុនា ខណៈដែលតម្រូវការខ្លាំងក្លា សម្រាប់រូបិយប័ណ្ណបរទេស បានធ្វើឲ្យអ្នកទិញទំនិញ ប្រឈមនឹងការលំបាក។

ការគ្រប់គ្រងទុនបានជួយការពារប្រាក់រូប្លិ៍ទល់នឹងភូមិសាស្ត្រនយោបាយ ក្នុងរយៈពេល ១៦ខែ ចាប់តាំងពីប្រទេសរុស្ស៊ីបានបញ្ជូនទាហានរាប់ម៉ឺននាក់ចូលទៅលុកលុយអ៊ុយក្រែន ប៉ុន្តែការដើរក្បួនមិនទាន់ចេញជារូបរាងរបស់មេដឹកនាំទាហានស៊ីឈ្នួល លោក Yevgeny Prigozhin ឆ្ពោះទៅកាន់ទីក្រុងម៉ូស្គូ កាលពីថ្ងៃទី២៤ ខែមិថុនា បានធ្វើឲ្យប៉ះពាល់ដល់ទីផ្សារ និងចោទជាសំណួរអំពីការក្ដាប់អំណាចរបស់ប្រធានាធិបតីលោក Vladimir Putin។

ត្រឹមម៉ោង ១៣:១៥នាទី ម៉ោងសកល ប្រាក់រូប្លិ៍បានធ្លាក់ចុះ ១,៧ភាគរយ ធៀបនឹងប្រាក់ដុល្លារ ពោលគឺ ១ដុល្លារ ស្មើនឹង ៩០,៥៤រូប្លិ៍ មុនធ្លាក់ដល់ ៩១,០៦៧៥រូប្លិ៍ ក្នុង ១ដុល្លារ ដែលជាការធ្លាក់ដ៏ទាបបំផុត គិតចាប់តាំងពីថ្ងៃទី២៨ ខែមីនា ឆ្នាំ២០២២។

រូបិយប័ណ្ណរុស្ស៊ី បានធ្លាក់ចុះ ១,៦ភាគ ពោលគឺស្មើនឹង ៩៨,៧៦រូប្លិ៍ ធៀបនឹងប្រាក់អឺរ៉ូ ដោយនៅមុននេះធ្លាក់ចុះលើស ៩៩រូប្លិ៍ ក្នុង ១អឺរ៉ូ ជាលើកដំបូងក្នុងរយៈពេលជាង ១៥ខែ ហើយបានធ្លាក់ចុះ ១,២ភាគរយ ធៀបនឹងប្រាក់យ័នរបស់ចិន ដោយធ្លាក់ដល់ ១២,៤៩រូប្លិ៍ ក្នុង ១យ័ន ដែលជាកម្រិតទាប ក្នុងរយៈពេលជាង១៤ខែ។

ប្រាក់រូប្លិ៍បានធ្លាក់ថ្លៃជាង ៩ភាគរយ នៅក្នុងខែមិថុនា ហើយបានដាំក្បាលចុះប្រហែល ២០ភាគរយ មកទល់ពេលនេះ ដែលធ្វើឲ្យក្លាយជារូបិយប័ណ្ណដំណើរការអាក្រក់បំផុតរបស់ពិភពលោក។ ឥឡូវនេះ ប្រាក់រូប្លិ៍កំពុងជួញដូរនៅខាងក្រៅជួរនៃតម្លៃចន្លោះ ៨០-៩០ ដែលឧបនាយករដ្ឋមន្ត្រីទី១ លោក Andrei Belousov បាននិយាយកាលពីខែមុនថា កំពុងមានភាពល្អប្រសើរ៕