ត្បូងឃ្មុំ ៖ ព្រឹកថ្ងៃទី ៦ ខែកក្កដា ឆ្នាំ ២០២៣ ដែលជាថ្ងៃទី៦នៃយុទ្ធនាការឃោសនាបោះឆ្នោត​ជ្រើសតាំងតំណាង​រាស្ត្រនីតិកាលទី៧ ឆ្នាំ២០២៣ ឯកឧត្តម ចាយ បូរិន សមាជិកគណៈអចិន្ត្រៃយ៍យុវជនគណបក្សថ្នាក់កណ្តាល និងជា​អនុប្រធានក្រុមការងារគណបក្សចុះមូលដ្ឋានស្រុកតំបែរទទួលបន្ទុកលើការងារយុវជន បានអញ្ជើញណែនាំ​ពីរបៀបគូសសន្លឹកឆ្នោតដល់សកម្មជនយុវជនគណបក្សភូមិ ឃុំ ដើម្បីបង្រៀនបន្តដល់សមាជិកបក្ស នៅក្នុងមូលដ្ឋាន​ស្រុកតំបែរ ខេត្តត្បូងឃ្មុំ ដែលមានអ្នកចូលរួមចំនួន៤៨៥នាក់ នៅទីស្នាក់ការគណបក្សស្រុកតំបែរ ខេត្តត្បូងឃ្មុំ។

ឯកឧត្តម ចាយ បូរិន បានពាំនាំនូវការផ្តាំផ្ញើសួរសុខទុក្ខពីសំណាក់ សម្តេចតេជោ ប្រធានគណបក្ស សម្តេចចក្រី ប្រធានកិត្តិយសគណបក្ស ជាពិសេសឯកឧត្តមបណ្ឌិត ហ៊ុន ម៉ាណែត ប្រធានយុវជនគបក្សថ្នាក់កណ្តាល​ ជូនអង្គពិធីទាំងមូល។

ឯកឧត្តម បានថ្លែងងអំណរគុណ និងកោតសរសើរដល់ក្រុមការងារយុវជនគណបបក្សគ្រប់ភូមិ ឃុំទូទាំងស្រុកតំបែរ ដែលបានសហការ រួបរួម និងសាមគ្គីគ្នាដោយស្មារតីទទួលខុសត្រូវខ្ពស់ រៀបចំយុទ្ធនាការឃោសនារកសំឡេង​ឆ្នោតជ្រើស​តាំងតំណាងរាស្ត្រ នីតិកាលទី៧ ក្នុងរយៈពេល ៥ថ្ងៃកន្លងមកនេះ បានប្រព្រឹត្តទៅដោយរលូន មាន​សន្តិសុខ សុវត្ថិភាព សណ្ដាប់ធ្នាប់ល្អ និងគ្មានអំពើហិង្សា។

ឯកឧត្តម បានលើកទឹកចិត្តដល់សកម្មជន និងអ្នកគាំទ្រគណបក្សគ្រប់ភូមិ ឃុំទូទាំងស្រុកតំបែរ ត្រូវបន្តធ្វើ​ការ​ឃោសនា​​​រកសំឡេងឆ្នោតតាមរូបភាពផ្សេងៗដូចជា ការជួបប្រជុំគ្នាការចាក់មេក្រូផ្សព្វផ្សាយ នៅទីស្នាក់​ការ​គណបក្ស និងចល័តតាមភូមិ បិទស្ទីកគ័រ ការចែកខិត្តបណ្ណតាមខ្នងផ្ទះ ការបិទខិត្តបណ្ណ និងបដានៅទីសាធារណៈ ជាដើម។ លើសពីនេះ ត្រូវផ្សព្វផ្សាយគោលនយោបាយរបស់គណបក្ស និងត្រូវរម្លឹកដល់​ប្រជាពលរដ្ឋឲ្យបាន​យល់ដឹងកាន់តែច្បាស់ពីឯកសារដែលត្រូវកាន់យកទៅបោះឆ្នោតបានរួមមាន៖

១- អត្តសញ្ញាណបណ្ណសញ្ញាតិខ្មែរ (អ.ខ) ២-ឯកសារបញ្ជាក់អត្តសញ្ញាណបម្រើឲ្យការបោះឆ្នោត (ឯ. អ) និង៣-អត្តសញ្ញាណបណ្ណសញ្ជាតិខ្មែរគំរូថ្មីដែលអស់សុពលភាពនៅក្នុងឆ្នាំ២០២២ និងឆ្នាំ២០២៣ អាចយកទៅបោះឆ្នោតបានដែរ។ ពិសេសជាងនេះទៅទៀត ត្រូវបង្រៀនសមាជិក សមាជិកាបក្សនិងប្រជាពលរដ្ឋឲ្យចេះពី របៀបគូសលើសន្លឹកឆ្នោតជូនគណបក្សប្រជាជនកម្ពុជា។

ឯកឧត្តម ចាយ បូរិន ក៏បានអំពាវនាវដល់សកម្មជន សមាជិក-សមាជិកាគណបក្ស និងប្រជាពលរដ្ឋទាំងអស់ សូមអញ្ជើញទៅបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុននេះ ឱ្យបានគ្រប់ៗគ្នា ពិសេស គឺត្រូវបោះឆ្នោត​ជូនគណបក្សប្រជាជនកម្ពុជា ដែលមានរូបសញ្ញា «ទេវតាបាចផ្កា» មានលេខរៀងទី១៨ ក្នុងសន្លឹកឆ្នោត ដោយ​យកគោលការណ៍ចង្អុលដៃខ្មៅ គឺសមាជិកម្នាក់សន្លឹកឆ្នោតមួយសន្លឹក ដែលបោះឆ្នោត​ជូនគណបក្សប្រជាជន​កម្ពុជាដើម្បីគាំទ្របេក្ខភាព សម្តេចតេជោ ហ៊ុន សែន ជានាយករដ្ឋមន្ត្រី អាណត្តិទី៧នេះ និងគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី បន្តវេនដឹកនាំប្រទេសជាតិនាពេលអនាគត៕