ក្រសួងការបរទេសចិន បានឲ្យដឹងនៅថ្ងៃព្រហស្បតិ៍ (ទី៦ ខែកក្កដា) នេះ ថា ប្រទេសជប៉ុនមិនបានពិគ្រោះយោបល់យ៉ាងពេញលេញជាមួយសហគមន៍អន្តរជាតិ ជាពិសេសភាគីពាក់ព័ន្ធ ជុំវិញការបញ្ចេញទឹកវិទ្យុសកម្មរបស់ខ្លួនពីរោងចក្រថាមពលនុយក្លេអ៊ែរហ្វូគូស៊ីម៉ា (Fukushima) ដែលត្រូវបានបំផ្លិចបំផ្លាញនោះទេ។

អ្នកនាំពាក្យរបស់ក្រសួងលោក Wang Wenbin បាននិយាយនៅក្នុងសន្និសីទសារព័ត៌មានជាប្រចាំថ្ងៃថា ការបញ្ចេញទឹកនេះ បង្ហាញពីភាពអាត្មានិយម និងភាពក្រអឺតក្រទមរបស់ប្រទេសជប៉ុន។

ទីភ្នាក់ងារថាមពលអាតូមិកអន្តរជាតិ (IAEA) នៅសប្តាហ៍នេះ បានផ្តល់ការអនុញ្ញាតដល់ប្រទេសជប៉ុន ក្នុងការចាប់ផ្តើមបញ្ចេញទឹកជាង១លានតោន ដែលគ្រប់គ្រាន់បំពេញអាងហែលទឹកអូឡាំពិកចំនួន ៥០០អាង ដោយទឹកនេះត្រូវប្រើសម្រាប់ធ្វើឲ្យត្រជាក់បំពង់ប្រេងឥន្ធនៈរបស់រោងចក្រ បន្ទាប់ពីរោងចក្រនោះ ត្រូវបានបំផ្លាញដោយរលកយក្សស៊ូណាមិ ក្នុងឆ្នាំ២០១១។

គម្រោងបញ្ចេញទឹកពីរោងចក្រភាគខាងជើងនៃទីក្រុងតូក្យូនេះ បានប្រឈមនឹងការប្រឆាំង ទាំងនៅក្នុងប្រទេស និងក្រៅប្រទេស ក្នុងនោះរួមទាំងប្រទេសចិនផងដែរ បើទោះបីជាមានការធានារបស់ជប៉ុនថា វាមានសុវត្ថិភាពបន្ទាប់ពីត្រូវបានច្រោះយកសារធាតុអ៊ីសូតូបភាគច្រើនបំផុតចេញក៏ដោយ។

សម្រាប់ការលើកឡើងដាច់ដោយឡែកផ្សេងទៀត មន្ត្រីរដ្ឋាភិបាលចិន ក៏បាននិយាយ នៅថ្ងៃព្រហស្បតិ៍ (ទី៦ ខែកក្កដា) នេះ ថា ប្រទេសចិននឹងបង្កើនការត្រួតពិនិត្យលើផលិតផលមហាសមុទ្រ និងសមុទ្រ បន្ទាប់ពីមានការបញ្ចេញទឹកនេះ៕