ភ្នំពេញ ៖ គណៈកម្មាធិការជាតិរៀបចំការបោះឆ្នោត ដែលហៅកាត់ថាគ.ជ.ប. បានឲ្យដឹងថា ថ្ងៃទី៦ នៃយុទ្ធនាការ ឃោសនារកសំឡេងឆ្នោតរបស់គណបក្សនយោបាយនានាទាំងក្នុងរាជធានីភ្នំពេញ និងតាមបណ្តាខេត្ត បានប្រព្រឹត្ត​ទៅដោយរលូន និងគ្មានហិង្សាណាមួយកើតឡើងនោះឡើយ។

 យោងតាមសេចក្តីប្រកាសព័ត៌មានរបស់គ.ជ.ប.ដែលបានចេញនូវល្ងាចថ្ងៃទី៦ ខែកក្កដា ឆ្នាំ២០២៣នេះបានបញ្ជាក់ថា នៅថ្ងៃនេះគឺជាថ្ងៃទី៦នៃយុទ្ធនាការឃោសនាបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ គណបក្ស​នយោបាយ និងកម្មវិធីនយោបាយរបស់ខ្លួនក្នុងការអភិវឌ្ឍប្រ ទេសជាតិទៅដល់ម្ចាស់ឆ្នោត។

សេចក្តីប្រកាសព័ត៌មានរបស់គ.ជ.ប.បានលើកឡើងទៀតថា ផ្អែកតាមរបាយការណ៍របស់គណៈ កម្មការរាជធានី ខេត្តរៀបចំការបោះឆ្នោត(គធ.ខប) នៅថ្ងៃទី៦នេះ មណ្ឌលបោះឆ្នោតទាំង២៥មានការ ឃោសនាបោះឆ្នោត​របស់​គណបក្សនយោបាយ ដែលមានសកម្មភាពដូចជា៖ការជួបប្រជុំសមាជិក និងអ្នក គាំទ្រគណបក្ស ការចាក់មេក្រូ​ផ្សព្វផ្សាយនៅទីស្នាក់ការគណបក្ស និងចល័តតាមភូមិ ការចែកខិត្តបណ្ណ តាមខ្នងផ្ទះ ការបិទខិត្តបណ្ណនិង​បដានៅ​ទីសាធារណៈ និងការចាក់បញ្ចាំងស្លាយវិដេអូ។ ដោយឡែក មណ្ឌលបោះឆ្នោតចំនួន៤មាន​សកម្មភាពហែក្បួន​ឃោសនា​បោះឆ្នោត គឺមណ្ឌលខេត្តក្រចេះ មានការហែ ក្បួនឃោសនារបស់គណបក្សកសិករ មណ្ឌលខេត្តស្វាយរៀង មានការហែក្បួនឃោសនារបស់គណបក្ស សញ្ជាតិកម្ពុជា មណ្ឌលខេត្តកំពត និងមណ្ឌលខេត្តស្ទឹងត្រែង មានការ​ហែក្បួនរបស់គណបក្សខ្មែររូបរួមជាតិ។ 

យ៉ាងណាក៏ដោយស្ថានភាពជារួមត្រូវបានគ.ជ.ប.បញ្ជាក់អះអាងថា«ដំណើរការឃោសនាបោះឆ្នោត​របស់​គណបក្សនយោបាយក្នុងបីថ្ងៃនេះ បានប្រព្រឹត្តទៅដោយរលូន មានសន្តិសុខ សុវត្ថិភាព សណ្តាប់ធ្នាប់ល្អ និងគ្មានអំពើហិង្សាជាដើម»។

 សូមបញ្ជាក់ថា យុទ្ធនាការឃោសនារកសំឡេងឆ្នោតរបស់គណបក្សនយោបាយនានាសម្រាប់ ជ្រើសតាំងតំណាង​រាស្រ្តនីតិកាលទី៧នេះ គឺធ្វើរយៈពេល២១ថ្ងៃគឺចាប់ពីថ្ងៃទី១ដល់ថ្ងៃទី២១ ខែកក្កដា ឆ្នាំ ២០២៣នេះ។ ការបោះឆ្នោតជ្រើសរើសតំណាងរាស្រ្តនីតិកាលទី៧នេះ នឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣ខាងមុខនេះ ដោយមានគណបក្សនយោបាយចំនួន១៨ចូលរួមប្រកួតប្រជែងតាម បែបប្រជាធិបតេយ្យសេរីពហុបក្ស៕ ដោយ ៖ បាន ចក់