ភ្នំពេញ៖ រាជរដ្ឋាភិបាលកម្ពុជាតែងមានការគិត និងរៀបចំផែនការទុកជាមុន សម្រាប់កិច្ចការនីមួយៗ។ ជាក់ស្ដែងសម្រាប់វិស័យសង្គម ដោយផ្តោតលើកម្មវិធីជំនួយសង្គម គឺ​រាជរដ្ឋាភិបាល ក៏ត្រៀមនឹងអនុវត្តកម្មវិធីជំនួយសង្គមថ្មីមួយទៀតគឺ ​កម្មវិធីកញ្ចប់គ្រួសារ ជា​កម្មវិធីច្របាច់បញ្ចូលគ្នា​នៃកម្មវិធីជំនួយសង្គមទាំងអស់។

កម្មវិធីនេះផ្តោតលើក្រុមគោលដៅ រាប់បញ្ចូលទាំង ជនពិការ មនុស្សវ័យចាស់ សិស្ស ក៏ដូចជាស្រ្តីមានផ្ទៃពោះ ​និងកុមារក្រោម ​២ឆ្នាំ​ ក្នុងគ្រួសារមានបណ្ណសមធម៌។

រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា អាចនឹងអនុវត្តកម្មវិធី​ជំនួយ​សង្គមថ្មី ក្នុងឆ្នាំ២០២៤ខាងមុខ។ កម្មវិធីជំនួយសង្គមនេះមានឈ្មោះថា «កម្មវិធីកញ្ចប់គ្រួសារ» ជា​កម្មវិធីមានលក្ខណៈអចិន្ត្រៃយ៍ ដែល​ច្របាច់​បញ្ចូលគ្នារាល់កម្មវិធីជំនួយសង្គមទាំងអស់​ដែល​កំពុង​អនុវត្តក្នុងពេលបច្ចុប្បន្ន ឱ្យមានការគ្របដណ្ដប់ពេញលេញ និងការអនុវត្តកាន់តែមានប្រសិទ្ធភាព។ នេះជាការបញ្ជាក់របស់ ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយកមូល​និធិជាតិ​ជំនួយសង្គម។

ឯកឧត្តមបញ្ជាក់ថា កម្មវិធីជំនួយសង្គមថ្មីនេះ គឺមានកម្មវិធីជំនួយសង្គមចំនួន៤ រួមបញ្ចូលគ្នា ក្នុងនោះរាប់បញ្ចូល​ទាំងស្រ្តីមានផ្ទៃពោះ​ និងកុមារអាយុក្រោមពីរឆ្នាំ ជនមានពិការភាព កម្មវិធី​សិស្សអាហារូបករណ៍ ​និងមនុស្សវ័យចាស់ ​រស់នៅក្នុងគ្រួសារមានបណ្ណសមធម៌។

ឯកឧត្តម បន្តថាកម្មវិធីជំនួយសង្គមថ្មីនេះ ទោះមានលក្ខណៈអចិន្ត្រៃយ៍ក្ដី តែពុំមានគោលដៅឱ្យ​អ្នកទទួលផល ​រស់ពឹងផ្អែកលើជំនួយថវិការដ្ឋនោះទេ។ គោលដៅគឺផ្ដល់ថវិកា ​និងផ្ដល់ការធានា​ប្រាក់ចំណូលរបស់ពួកគេ។

ការត្រៀមដាក់អនុវត្តកម្មវិធីជំនួយសង្គមថ្មីនេះ ​រាជរដ្ឋាភិបាលក៏បានត្រៀម​កញ្ចប់ថវិកា​ផងដែរ​សម្រាប់​ឆ្នាំដំបូង​ គឺរាជរដ្ឋាភិបាលត្រៀមថវិកា​ប្រមាណជាង​ ១២០លានដុល្លារ។ នេះជាការបញ្ជាក់ថែម​របស់​ប្រតិភូរាជរដ្ឋាភិបាលទទួឡបន្ទុកជា​អគ្គនាយកមូលនិធិជាតិ​ជំនួយ​សង្គម៕អត្ថបទ៖ គឹមហុក