ភ្នំពេញ៖ ក្រុមការងារគណបក្សប្រជាជនកម្ពុជា ក្នុងរាជធានីភ្នំពេញ បានបន្តចុះបង្រៀន និងពន្យល់ពលរដ្ឋតាមមូលដ្ឋាន ពីរបៀបគូសសន្លឹកឆ្នោតឲ្យបានត្រឹមត្រូវ តាមលក្ខខណ្ឌតម្រូវរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីឲ្យសន្លឹកឆ្នោតនោះ យកជាការបាន ។

ក្នុងពេលចុះបង្រៀនពលរដ្ឋ ពីរបៀបគូសសន្លឹកឆ្នោត ក្នុងមូលដ្ឋានសង្កាត់ទឹកល្អក់៣ ខណ្ឌទួលគោក លោក គឹម គីរី សមាជិកគណបក្សសង្កាត់ទឹកល្អក់ទី៣ លើកឡើងថា ចាប់ពីថ្ងៃបើកយុទ្ធនាការរកសំឡេងឆ្នោត សម្រាប់អាណត្តិទី៧ ក្រុមការងារបក្សសង្កាត់ បាន ចុះបង្រៀន និងផ្សព្វផ្សាយពីគោលនយោបាយបក្សជារៀងរាល់ថ្ងៃ នៅតាមខ្នងផ្ទះ ទៅដល់ប្រជាពលរដ្ឋ ។

លោកបានបន្តថា ការចុះនេះ ក៏ដើម្បីឆ្លើយតបផងដែរ ទៅជនខិលខូចមួយចំនួន ដែលបន្លំខ្លួនធ្វើ​ជាថ្នាក់​ដឹកនាំគណបក្សប្រជាជនកម្ពុជា ​ណែនាំឲ្យពលរដ្ឋ ​ឲ្យគូសសន្លឹកឆ្នោតខុស និងបានអំពាវនាវ​កុំឲ្យពលរដ្ឋ ធ្វើតាមជនខិលខូចទាំងនោះ ។

គួរបញ្ជាក់ថា សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា​ កាលពីពេលថ្មីៗនេះ បានបញ្ជាឱ្យ​សមត្ថកិច្ច ​និងក្រសួងពាក់ព័ន្ធស្រាវជ្រាវឃាត់ខ្លួនឱ្យបាន នូវជន​ទុច្ចរិត​ក្លែងបន្លំ​ជា​ថ្នាក់ដឹកនាំ​គណបក្ស​ប្រជាជនកម្ពុជា ​បានទៅណែនាំ ​អ្នកបោះឆ្នោតឱ្យគូស​សន្លឹកឆ្នោតខុស ក្លាយ​ទៅជា​សន្លឹកឆ្នោតមិនបានការ ។

សម្ដេចតេជោ បានចាត់ទុកថា ទង្វើបែបនេះ ​ទាមទារឱ្យគ្រប់គណបក្សនយោបាយទាំងអស់ ត្រូវតែ​បង្រៀនប្រជាពលរដ្ឋ សមាជិកសមាជិការបស់ខ្លួនឱ្យចេះគូស​សន្លឹកឆ្នោត ដើម្បីជាសន្លឹកឆ្នោត​បានការ ៕ អត្ថបទ បានសុខរិទ្ធិ