កណ្ដាល៖ បណ្តាយុវជន សិស្ស និស្សិត និងពលរដ្ឋមួយចំនួន ប្រឹងប្រែងបង្កើនជំនាញរបស់ខ្លួន តាមរយៈរៀនជំនាញវិជ្ជាជីវៈ ខណៈបច្ចុប្បន្នរាជរដ្ឋាភិបាលកម្ពុជា បានគិតគូរខ្ពស់ ដោយជំរុញបង្កើត​សាលាបណ្តុះបណ្តាលជំនាញវិជ្ជាជីវៈជាច្រើនកន្លែង នៅតាមបណ្តារាជធានីខេត្តទូទាំងប្រទេស ដើម្បីផ្តល់ឱកាសសិស្ស និស្សិតក្នុងស្ថិតគ្រួសារជួបការខ្វះខាតនានា​ និងពលរដ្ឋ ទទួលបាន​ឱកាសរៀនជំនាញវិជ្ជាជីវៈដោយឥតគិតថ្លៃ ​ដើម្បីងាយស្រួលរកការងារ ​ការបង្កើតមុខរបរ និងការជំរុញកម្រិតជីវភាពគ្រួសារមានការរីកចំរើន។

បើតាមបណ្តាក្រុមសិស្ស ដែលកំពុងរៀបជំនាញវិជ្ជាជីវៈ នៅវិទ្យាស្ថានជាតិពហុបច្ចេកទេសតេជោសែន នៅក្រុងតាខ្មៅ ខេត្តកណ្តាល ​បានថ្លែងប្រាប់BTV​ នៅថ្ងៃទី៧ ខែកក្កដានេះថា បច្ចុប្បន្ន ការប្រកបមុខរបរនានាទាំងអស់ គឺសុទ្ធតែត្រូវការជំនាញវិជ្ជាជីវៈច្បាស់លាស់ ដើម្បីធ្វើការងារ និងការប្រកបមុខរបរនានា​នៅ​ក្នុងសង្គម ហេតុដូចនេះ ​ធ្វើឲ្យយើងទាំងអស់គ្នា ​បាននាំគ្នាមករៀនជំនាញវិជ្ជាជីវៈឲ្យត្រឹមត្រូវ ដើម្បី​ទៅធ្វើការងារ និងការបង្កើតមុខរបរ ​ត្រឹមត្រូវមួយ ​ហើយអាចរកប្រាក់ចំណូលបានងាយស្រួល និងការជំរុញកំណើនកម្រិតជីវភាពឲ្យរីកចំរើនថែមទៀត។ ពួកគេក៏បានអរគុណរដ្ឋាភិបាល​ដែល​បង្កើត​សាលាបណ្តុះបណ្តាលជំនាញវិជ្ជាជីវៈជាច្រើន ​ជា​យុទ្ធសាស្ត្រមួយដ៏សំខាន់ ជំរុញពលរដ្ឋ​មានការងារល្អ ​និងប្រាក់ចំណូលខ្ពស់ ​តាមរយៈជំនាញវិជ្ជាជីវៈច្បាស់លាស់។

សូមបញ្ជាក់ថា បច្ចុប្បន្នសាលាបណ្តុះបណ្តាលជំនាញវិជ្ជាជីវៈ TVET មានទាំងរាជធានីភ្នំពេញ និងតាមបណ្តាខេត្ត ភូមិភាគ ផ្តល់ឱកាសអោយយុវជន អាចរៀនបន្តយកជំនាញ​បច្ចេកទេសវិជ្ជាជីវៈ និង​យុវជនបោះបង់ចោលការសិក្សាក៏អាចមករៀនជំនាញវគ្គសិក្សាខ្លីឬវែងបានដែរ ជាក់ស្តែង​នៅក្នុង​វិទ្យាស្ថានជាតិ​ពហុបច្ចេកទេសតេជោសែន ក្រុងតាខ្មៅ បច្ចុប្បន្នបានផ្តល់បណ្តុះបណ្តាល​ជំនាញវិជ្ជាជីវៈដោយឥតគិតថ្លៃ​ មានជាច្រើនជំនាញ រួមមាន៖ ជំនាញអគ្គិសនី ជំនាញវិទ្យាសាស្ត្រ​កុំព្យូទ័រ ជំនាញភាសាអង់គ្លេស ​ជំនាញបរិក្ខាម៉ាស៊ីនត្រជាក់ ជំនាញយន្តសាស្ត្ររថយន្ត សំណង់​ស៊ីវិល បសុព្យាបាល គ្រប់គ្រង​ពាណិជ្ជកម្ម ​ហើយក្រៅពីនេះ ​ក៏​មាន​បង្ហាត់បង្រៀន​ជំនាញ​ថែទាំ ​និងជួសជុលរថយន្ត ​ផ្សារអគ្គិសនី ​ការងារជាងកំបោរ ​ជំនាញ រក្សាសម្ផស្ស និងសំអាងកាយ និង​ការផលិតនំជាដើម ហើយសិស្សចាប់ពីថ្នាក់ទី៩ គឺអាចចូលរៀនបាន​ផងដែរ៕ អត្ថបទ ស៊ុម សុខជា