ចលនាតស៊ូឥស្លាមប៉ាឡេស្ទីនហាម៉ាស (Hamas) នៅថ្ងៃព្រហស្បតិ៍នេះ បានអះអាងទទួលខុសត្រូវចំពោះការសម្លាប់មន្ត្រីសន្តិសុខអ៊ីស្រាអែលម្នាក់ នៅក្នុងការបាញ់ប្រហារ នៅតំបន់វេសបែងភាគខាង ជើង។

កងកម្លាំងប្រដាប់អាវុធរបស់ក្រុមហាម៉ាសនៃកងពលតូច Al-Qassam បានបញ្ជាក់នៅក្នុងខិត្តប័ណ្ណមួយថា សមាជិករបស់ខ្លួន Ahmad Ghizan ត្រូវបានសម្លាប់ បន្ទាប់ពីបានធ្វើការបាញ់ប្រហារនៅជិតភូមិ Kafr Qaddum ភាគខាងកើតទីក្រុងQalqilya(កាល់គីលីយ៉ា)នៃតំបន់វេសបែង។

ខិត្តប័ណ្ណនោះ បាននិយាយថា Ghizan ជាអ្នកស្រុកនៃភូមិQibya ក្បែរទីក្រុងរ៉ាម៉ាល់ឡាហ៍(Ramallah) ភាគខាងលិច បានធ្វើការវាយប្រហាជាការឆ្លើយតបដ៏រហ័សទៅនឹងការវាយឆ្មក់របស់យោធាអ៊ីស្រាអែលទៅលើទីក្រុងជេនីននិងជំរំជនភៀសខ្លួនពីថ្ងៃចន្ទដល់ថ្ងៃអង្គារ។ ការវាយប្រហាររបស់អ៊ីស្រាអែលបានបណ្តាលឲ្យប្រជាជនប៉ាឡេស្ទីនយ៉ាងតិច ១៣នាក់ និងទាហានអ៊ីស្រាអែលម្នាក់ ស្លាប់។

ចាប់តាំងពីខែមករាមក មនុស្សចំនួន ២៦នាក់ ដែលភាគច្រើនជាជនជាតិអ៊ីស្រាអែល ត្រូវបានសម្លាប់នៅក្នុងការវាយប្រហារជាបន្តបន្ទាប់ដែលធ្វើឡើងដោយប៉ាឡេស្ទីន ខណៈដែលជនជាតិប៉ាឡេស្ទីនចំនួន ១៩០នាក់ ត្រូវបានសម្លាប់ដោយទាហាន និងអ្នកតាំងលំនៅរបស់អ៊ីស្រាអែល។ នេះបើយោងតាមតួលេខផ្លូវការ៕