ភ្នំពេញ៖ គិតមកដល់បច្ចុប្បន្ននេះការអនុវត្តរបបសន្តិសុខសង្គម​នៅកម្ពុជា បានរីកសាយភាយ​កាន់​តែច្រើនឡើងជូនដល់ប្រជាពលរដ្ឋនៅទូទាំងកម្ពុជា ​ទាំងវិស័យសាធារណៈ ​និងវិស័យឯកជន រហូតឈានទៅដល់កម្មករនិយោជិតក្រៅប្រព័ន្ធផងដែរ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញវត្ថុ កាលពីថ្ងៃទី៦ ខែកក្កដាកន្លងទៅ ​ក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារស្នាក់​ការកណ្តាលបេឡាជាតិសន្តិសុខសង្គម ហៅកាត់ ប.ស.ស ​បានមានប្រសាសន៍ថា ឯកឧត្តម បាន​ជំរុញនិងណែនាំឲ្យដៃគូពាក់ព័ន្ធ ត្រូវពង្រីកវិសាលភាពគ្រប់ដណ្តប់ការថែទាំសុខភាព​ទៅ​កាន់គ្រួសារ​សមាជិក ប.ស.ស ទាំងវិស័យសាធារណៈ ​និងវិស័យឯកជន ​ក៏ដូចជា​បង្កើតយន្តការ​គាំពារ​សង្គមចំពោះការងារសេដ្ឋកិច្ចក្រៅប្រព័ន្ធ ​ជំរុញឲ្យចូលទៅក្នុងប្រព័ន្ធជាដើម។ល។

លោក អាត់ ធន់ ប្រធានសហភាពការងារកម្ពុជា ​បានទទួលស្គាល់ថា ​បច្ចុប្បន្ននេះ វិស័យសន្តិសុខ​សង្គមមានការរីកចម្រើនគួរឱ្យកត់សម្គាល់ ដែលក្នុងនោះកម្ពុជាបានអនុវត្តនូវរបបសន្តិសុខ​ជាច្រើន​សម្រាប់សមាជិករបស់ខ្លួន។

តាមឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ​បានបញ្ជាក់ថា សព្វថ្ងៃនេះ ​កម្ពុជាបានអនុវត្តរបបសន្តិសុខសង្គមចំនួន៣ហើយ រួមមាន៖ ​ផ្នែកហានិភ័យការងារ , ផ្នែកថែទាំសុខភាព និងផ្នែកប្រាក់សោធន សម្រាប់បុគ្គលទាំងឡាយដែលស្ថិតនៅក្រោម​បទប្បញ្ញត្តិនៃច្បាប់ស្តីពីការងារ៕ អត្ថបទ ឈិត បូរ៉ាវី