បាល់ទាត់៖ បន្ទាប់ពីរងបរាជ័យ ៣ប្រកួតផ្ទួនៗកាលពីដើមរដូវកាល ក្រុមនគរបាលជាតិបានទទួល ១ពិន្ទុដំបូងហើយ បន្ទាប់ពីប្រកួតស្មើក្រុមវិសាខាដោយលទ្ធផល ១-១ ក្នុងជំនួបបង្គ្រប់សប្ដាហ៍ទី២ នៃពានរង្វាន់មិត្តហ្វូនខេមបូឌានលីគ នៅកីឡដ្ឋានព្រីនស៍កាលពីថ្ងៃទី១៥ ខែឧសភា ឆ្នាំ២០២១។
ជុំវិញការចែកគ្នា ១ពិន្ទុម្នាក់នេះ បានធ្វើឲ្យអ្នកគាំទ្រក្រុមវិសាខាហាក់មិនពេញចិត្តឡើយ ដែលបេក្ខភាពក្រុមប្រកួតវគ្គជម្រុះពានរង្វាន់កម្រិតទី២ ប្រចាំទ្វីបអាស៊ី AFC Cup 2021 នេះបានប្រកួតស្មើលើទឹកដីរបស់ខ្លួនផ្ទួនៗបែបនេះ ពិសេសក្រោយប្រកួតស្មើក្រុមភ្ញៀវនគរបាលជាតិនេះតែម្ដង។ ជំនួបដ៏តានតឹងនេះវគ្គទី១ ក្រុមទាំងពីរមិនអាចបំប៉ោងសំណាញ់ទីគ្នាបានឡើយ តែចូលវគ្គទី២ ទាន់ស្រួលបួលផង នគរបាលជាតិក៏មានឱកាសទាត់បាល់ពិន័យ ១១ម៉ែត្របានសម្រេច ១គ្រាប់ដោយកីឡាករ Otani Soma នៅនាទីទី៤៧។ បន្ទាប់មកវិសាខាបានព្យាយាមវាយបកកាន់តែខ្លាំងរហូតដល់នាទីទី៦៩ ទើបកីឡាករ Ajayi ដែលទើបប្ដូរចូលបានរកគ្រាប់បាល់តាមស្មើឲ្យក្រុមម្ចាស់ផ្ទះវិញ ១-១ ហើយលទ្ធផលនេះបានរក្សារហូតដល់ចប់ការប្រកួតតែម្ដង។
នេះគឺជាប្រកួតទី២ របស់ក្រុមវិសាខា ដែលបានបញ្ចប់ត្រឹមលទ្ធផលស្មើក្រុមភ្ញៀវលើទឹកដីខ្លួន បន្ទាប់ពីប្រកួតបើករដូវកាលស្មើក្រុមកងយោធពលខេមរភូមិន្ទ ០-០។ រីឯក្រុមនគរបាលជាតិទើបរកបាន ១ពិន្ទុប៉ុណ្ណោះបន្ទាប់ពីឆ្លងកាត់ ៤ប្រកួតស្មើ១ និងចាញ់៣ ពោលគឺ ៣ប្រកួតដំបូងចាញ់ក្រុមអគ្គិសនីកម្ពុជា និងចាញ់ក្រុមអាស៊ីអឺរ៉ុបក្នុងលទ្ធផល ៣-២ ដូចគ្នា មុនបន្ដប្រកួតចាញ់ក្រុមអង្គរថាយហ្គឺរ ១-០ កាលពីពេលកន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
