បន្ទាប់ពីដំណើរទៅដល់របស់រដ្ឋមន្ត្រីរតនាគារសហរដ្ឋអាមេរិកលោកស្រី Janet Yellen សម្រាប់ដំណើរទស្សនកិច្ចរយៈពេលបួនថ្ងៃទៅកាន់ទីក្រុងប៉េកាំង ក្រសួងហិរញ្ញវត្ថុរបស់ប្រទេសចិនបាននិយាយនៅថ្ងៃសុក្រនេះថា ខ្លួនរំពឹងថាសហរដ្ឋអាមេរិកនឹងចាត់វិធានការជាក់ស្តែងឆ្ពោះទៅរកការជំរុញបរិយាកាសសេដ្ឋកិច្ច និងពាណិជ្ជកម្មដ៏អំណោយផលរវាងប្រទេសទាំងពីរ។

ដំណើរទស្សនកិច្ចរបស់លោកស្រី Yellen ត្រូវបានគេមើលឃើញថាជាជំហានចុងក្រោយដើម្បីអនុវត្តការស្របមតិគ្នាឯកច្ឆ័ន្ធដែលប្រមុខរដ្ឋទាំងពីរនៃប្រទេសចិន និងសហរដ្ឋអាមេរិកសម្រេចបាន នៅក្នុងកិច្ចប្រជុំកំពូលកោះបាលីរបស់ក្រុមប្រទេសទាំង២០ (G20) កាលពីឆ្នាំ២០២២ ក្នុងគោលបំណងពង្រឹងទំនាក់ទំនងទ្វេភាគី និងការផ្លាស់ប្តូរក្នុងវិស័យហិរញ្ញវត្ថុ។

មន្ត្រីម្នាក់មកពីក្រសួងហិរញ្ញវត្ថុចិនបាននិយាយថា ទំនាក់ទំនងសេដ្ឋកិច្ច និងពាណិជ្ជកម្មចិន-អាមេរិក មានអត្ថប្រយោជន៍ទៅវិញទៅមក ហើយវានឹងមិនមានអ្នកឈ្នះនៅក្នុងសង្គ្រាមពាណិជ្ជកម្ម ឬ "ការកាត់ផ្ដាច់ខ្លួន និងបំបែកខ្សែសង្វាក់នោះទេ"។

លោកស្រី Yellen ត្រូវគេរំពឹងថានឹងជួបជាមួយបណ្ដាមន្ត្រីជាន់ខ្ពស់ចិន ហើយភាគីទាំងពីរគ្រោងនឹងជួបពិភាក្សាគ្នាលើបញ្ហាសេដ្ឋកិច្ច និងពាណិជ្ជកម្ម ព្រមទាំងទំនាក់ទំនងចិន-អាមេរិក ក្នុងចំណោមបញ្ហាផ្សេងទៀត។ ដំណើរទស្សនកិច្ចរបស់លោកស្រីដែលមានរយៈពេលរហូតដល់ថ្ងៃអាទិត្យ ធ្វើឡើងតែប៉ុន្មានសប្តាហ៍ប៉ុណ្ណោះ បន្ទាប់ពីរដ្ឋមន្ត្រីការបរទេសសហរដ្ឋអាមេរិកលោក Antony Blinken បានធ្វើទស្សនកិច្ចនៅប្រទេសចិន៕