ភ្នំពេញ៖ សមាជិករបស់សមាគមអភិរក្សស៊ីក្លូ ប្រមាណជាង ៣០០នាក់ ចាប់ពីថ្ងៃទី២០ ខែកក្កដាខាងមុខនេះ នឹងចាកចេញពីក្រុងភ្នំពេញ ទៅកាន់ស្រុកកំណើតរៀងៗខ្លួន ដើម្បីទៅចូលរួមបោះឆ្នោតជ្រើសរើសតំណាងរាស្រ្ត។ ពួកគាត់បានបញ្ជាក់ឲ្យដឹងដែរថា នឹងបោះឆ្នោតជូនគណបក្សប្រជាជនកម្ពុជា ដើម្បីការពារសុខសន្តិភាព និងការអភិវឌ្ឍន៍។

លោក អឹម សម្បត្តិ ប្រធានសមាគមអភិរក្សស៊ីក្លូកម្ពុជា និងមុខរបរក្រៅប្រព័ន្ធ ក្នុងបទសម្ភាសន៍ជាមួយទូរទស្សន៍ព័ត៌មាន ប៊ីធីវី នៅព្រឹកថ្ងៃទី៨ ខែកក្កដានេះ បានឲ្យដឹងថា សមាជិកទាំងអស់ រួមទាំងរូបលោក នឹងបោះឆ្នោតគាំទ្រគណបក្សប្រជាជនកម្ពុជា ដើម្បីអភិវឌ្ឍន៍ប្រទេសឲ្យមានការរីកចម្រើនជឿនលឿនទៅមុខថែមទៀត។ លោកបានឲ្យដឹងទៀតថា សព្វថ្ងៃនេះ ដោយសារគណបក្សប្រជាជន បានធ្វើឲ្យការរស់នៅល្អប្រសើរជាងមុន និងមានអារម្មណ៍ថាកក់ក្តៅ ដោយសារទទួលបានការយកចិត្តទុកដាក់ពីថ្នាក់ដឹកនាំ ដូចជារបបគាំពារសង្គមមូលនិធិត្រីចក្រយានកម្ពុជា ដោយក្នុងនោះទទួលបានប្រាក់ឧបត្ថម្ភចំនួន ២លើក ក្នុងមួយខែៗ និងសុខុមាលភាពជាដើម។

សមាជិកនៃសមាគមអភិរក្សស៊ីក្លូ លោក ទេព សំអាង បាននិយាយថា មូលហេតុដែលបន្តគាំទ្រគណបក្សប្រជាជនកម្ពុជា ដោយសារគណបក្សមួយនេះ មិនដែលទុកគាត់ចោលនោះទេ ជាពិសេសតាមរយៈការផ្តល់បណ្ណមូលនិធិសមធម៌ ដែលជាចំណូលបន្ថែម ក្នុងការជួយសម្រាលបន្ទុកដល់ការរស់នៅសព្វថ្ងៃ ប្រៀបបានទៅនឹងប្រាក់ចូលនិវត្តន៍ បើទោះជាពួកគាត់ បានធាក់ស៊ីក្លូ ឬមិនមានភ្ញៀវក៏ដោយ។

ការបោះឆ្នោតជ្រើសរើសតំណាងរាស្រអាណិត្តទី៧ នឹងចាប់ផ្តើមនៅថ្ងៃអាទិត្យទី២៣ ខែកក្កដា ឆ្នាំ២០២៣ ដោយមានគណបក្សចំនួន១៨ ចូលរួមប្រកួតប្រជែង៕ អត្ថបទ៖ ឈិត បូរ៉ាវី​