ប្រព័ន្ធផ្សព្វផ្សាយក្នុងស្រុករបស់សហរដ្ឋអាមេរិក បានរាយការណ៍ថា ចៅក្រមសហព័ន្ធកាលពីថ្ងៃសុក្រ (ទី៧ ខែកក្កដា) បានកាត់ទោសជនស្បែកសជ្រុលនិយមម្នាក់ឲ្យជាប់ពន្ធនាគារអស់មួយជីវិតក្នុងបទចោទ៩០ករណីជាប់ៗគ្នា ពាក់ព័ន្ធនឹងការបាញ់ប្រហារកាលពីឆ្នាំ២០១៩ ដែលបានសម្លាប់មនុស្ស ២៣នាក់ និងធ្វើឲ្យ ២២នាក់ទៀតរងរបួស នៅឯកន្លែងលក់ទំនិញ ក្នុងរដ្ឋតិចសាស់ (Texas) ខណៈពេលដែលបំណងនៃការបាញ់ប្រហារ បានកំណត់គោលដៅទៅលើក្រុមមនុស្សនិយាយភាសាអេស្ប៉ាញ។

ការកាត់ទោសដោយចៅក្រមសហព័ន្ធប្រចាំតំបន់របស់អាមេរិក David Guaderrama នៅទីក្រុង El Paso ធ្វើទៅតាមកិច្ចព្រមព្រៀងផ្តល់ចម្លើយរបស់ចុងចោទ កាលពីខែកុម្ភៈ ដែលអ្នកបាញ់ប្រហារលោក Patrick Crusius វ័យ ២៤ឆ្នាំ បានផ្តល់ចម្លើយពីភាពមានទោស និងយល់ព្រមទទួលទោសជាប់ពន្ធនាគារអស់មួយជីវិតក្នុងបទចោទ៩០ករណីជីវិតជាប់ៗគ្នា ដោយការព្រមព្រៀងនេះ គឺដើម្បីចៀសវាងទោសប្រហារជីវិតរបស់តុលាការសហព័ន្ធ។ តែយ៉ាងណា ខ្មាន់កាំភ្លើងរូបនេះ នៅតែប្រឈមមុខនឹងការចោទប្រកាន់របស់រដ្ឋតិចសាស់ ដែលអាចនាំមានការកាត់ទោសប្រហារជីវិតដដែល។

លោក Crusius មិនបាននិយាយអ្វីនោះឡើយ នៅក្នុងតុលាការទេ។ យោងតាមសារព័ត៌មាន Tribune នៅរដ្ឋតិចសាស់ បានឲ្យដឹងថា មេធាវីរបស់អ្នកទោស លោក Joe Spencer បានធ្វើសេចក្តីថ្លែងការណ៍មួយ សម្រាប់កូនក្ដីរបស់លោក ដែលក្នុងនោះលោកមេធាវី បានប្រាប់ថា ដោយសារមានជំងឺផ្លូវចិត្ត ទើបជំរុញឲ្យកូនក្ដីរបស់លោកធ្វើការបាញ់ប្រហារនេះ តែរដ្ឋអាជ្ញាបានបដិសេធ ហើយបាននិយាយថា អ្នកទោស Crusius ដឹងច្បាស់ពីអ្វី ដែលរូបគេកំពុងធ្វើ នៅពេលដែលរូបគេបានធ្វើការបាញ់សម្លាប់រង្គាលនោះ៕