នគរបាលឥណ្ឌា បាននិយាយ កាលពីថ្ងៃសុក្រ (ទី៧ កក្កដា) ថា បានចាប់ខ្លួនមនុស្ស ៣នាក់ ជុំវិញករណីរថភ្លើង ៣គ្រឿងបុកគ្នា ដែលបានសម្លាប់មនុស្សជិត ៣០០នាក់ កាលពីខែមុន ដែលនេះជាគ្រោះថ្នាក់ផ្លូវដែកដ៏អាក្រក់បំផុតមួយ នៅក្នុងប្រវត្តិសាស្ត្ររបស់ប្រទេស។

សេចក្តីថ្លែងការណ៍ពីការិយាល័យស៊ើបអង្កេតកណ្តាល បានឲ្យដឹងថា បុគ្គលិកផ្លូវរថភ្លើងចំនួន ៣នាក់ ត្រូវបានចោទប្រកាន់ពីបទមនុស្សឃាត ដែលគួរត្រូវបានកាត់ទោស និងពីបទបំផ្លាញភ័ស្តុតាង នៅក្នុងសំណុំរឿង ដែលបានប្តឹងពួកគេ កាលពីថ្ងៃព្រហស្បតិ៍។ សេចក្តីថ្លែងការណ៍នោះ បានផ្ដល់ភិនភាគមនុស្សទាំងនោះ ជាវិស្វករផ្ដល់សញ្ញា ២នាក់ និងអ្នកបច្ចេកទេសម្នាក់ ដែលបម្រើការជាមួយក្រុមហ៊ុនអយស្ម័យយានឥណ្ឌា ដោយមិនបានផ្តល់ព័ត៌មានលម្អិតបន្ថែមនោះទេ។

រថភ្លើងបុកគ្នា កាលពីខែមិថុនា នៅរដ្ឋ Odisha ភាគខាងកើត បានកើតឡើង នៅពេលដែលរថភ្លើងដឹកអ្នកដំណើរ ត្រូវបានបង្វែរទិសដៅខុសបច្ចេកទេស ហើយបានទៅបុកផ្ទប់យ៉ាងពេញទំហឹងជាមួយរថភ្លើងដឹកទំនិញឈប់ចតស្ងៀម ដែលផ្ទុកដោយរ៉ែដែក។ ទូដែលធ្លាក់ចេញពីផ្លូវនោះ បន្ទាប់មកបានបុកជាមួយទូរថភ្លើងដ៏លឿនមួយទៀត គឺ Howrah Superfast Express ចេញពីក្រុង Bengaluru ដែលកំពុងឆ្លងកាត់ក្នុងទិសដៅផ្ទុយគ្នា។

ប៉ុន្មានថ្ងៃបន្ទាប់ពីឧបទ្ទវហេតុនេះ រដ្ឋមន្ត្រីផ្លូវដែករបស់ប្រទេសឥណ្ឌា លោក Ashwini Vaishnaw បាននិយាយថា ការបុកគ្នានេះ គឺបណ្ដាលមកពីការផ្ដល់សញ្ញាខុស ហើយថា «អ្នកទទួលខុសត្រូវចំពោះគ្រោះថ្នាក់» ត្រូវបានកំណត់អត្តសញ្ញាណ៕