ភ្នំពេញ៖ សារមន្ទីរព្រះស្រីឦសានវរ្ម័ន បានជូនដំណឹងថា ខែកក្កដា ឆ្នាំ ២០២៣ នេះ គឺជាខែចុងក្រោយនៃការតាំងពិព័រណ៍មិនអចិន្ត្រៃយ៍ស្តីពី «ព្រះរាជទស្សនកិច្ចទៅកាន់ប្រទេសបារាំងរបស់ ព្រះបាទ ស៊ីសុវត្ថិ នាឆ្នាំ១៩០៦៖ គ្រាដំបូងនៃការស្វែងយល់ចិត្តគ្នារវាងខ្មែរ និងបារាំង» ។ ពោលគឺ នៅសល់តែ២៣ថ្ងៃទៀតប៉ុណ្ណោះ ដែលសាធារណជន និងអ្នកចូលចិត្តស្រាវជ្រាវប្រវត្តិសាស្រ្ត មានឱកាសទស្សនាពិព័រណ៍ដោយឥតគិតថ្លៃ នៅសារមន្ទីរព្រះស្រីឦសានវរ្ម័ន ឬសារមន្ទីរ ស.ស.រ ដែលមានអាស័យដ្ឋានជិតរមណីយដ្ឋានប្រវត្តិសាស្រ្តវត្តភ្នំ។ នេះបើយោងតាម សេចក្ដីជូនដំណឹងដែលទូរទស្សន៍ BTV ទទួលបាននាថ្ងៃទី ៨ កក្កដា ឆ្នាំ២០២៣ ។ 

ពិព័រណ៍ស្ដីពី «ព្រះរាជទស្សនកិច្ចទៅកាន់ប្រទេសបារាំងរបស់ ព្រះបាទ ស៊ីសុវត្ថិ នាឆ្នាំ១៩០៦៖ គ្រាដំបូងនៃការស្វែងយល់ចិត្តគ្នារវាងខ្មែរ និងបារាំង» គឺជាទស្សនីយភាពដ៏កម្រ នៃព្រះរាជដំណើរទស្សនកិច្ចដ៏គួរឱ្យចាប់អារម្មណ៍បំផុតរបស់ព្រះមហាក្សត្ររខ្មែរនៅឯប្រទេសបារាំង ដែលកំពុងដាក់តាំងបង្ហាញនៅក្នុងសារមន្ទីរ ស.ស.រ ។ 

ពិព័រណ៍នេះ ផ្តល់នូវឱកាសដែលមិនធ្លាប់មានពីមុនមកក្នុងការចូលទស្សនានូវទស្សនីយភាពនៃព្រះរាជដំណើរទស្សនកិច្ចរបស់ ព្រះបាទ ស៊ីសុវត្ថិ ដោយមានការដាក់តាំងបង្ហាញនូខ្សែភាពយន្តឯកសារចំនួន៥ និងវត្ថុតាំងចំនួន ៦៩ រួមមាន ប័ណ្ណប្រៃសនីយ៍ច្បាប់ដើម រូបថត អត្ថបទព័ត៌មាន និងកាសអនុស្សាវរីយ៍ជាច្រើន ដើម្បីបង្ហាញពីឥទ្ធិពលការទូត និងវប្បធម៌ដ៏អស្ចារ្យរបស់ព្រះអង្គ រួមជាមួយនឹងភាពទាក់ទាញដែលបង្កើតឡើងដោយព្រះមហាក្សត្រខ្មែរ ក្នុងចំណោមសាធារណជននិងឥស្សរជនបារាំង។

ដោយការតាំងពិព័រណ៍នេះនឹងឈានទៅដល់ថ្ងៃបិទបញ្ចប់នាពេលខាងមុខ សារមន្ទីរ ស.ស.រ មានបំណងចង់ឱ្យសាធារណជនទាំងអស់មានឱកាសស្វែងយល់ពីទិដ្ឋភាពដ៏កម្រ នៃរឿងរ៉ាវប្រវត្តិសាស្ត្រដ៏គួរឱ្យកត់សម្គាល់ និងស្រាយចំណងដ៏ស្មុគស្មាញនៃទំនាក់ទំនងផ្នែកនយោបាយ និងវប្បធម៌ក្នុរវាងខ្មែ និងប្រទេសបារាំងក្នុងអំឡុងពេលដំណើរទស្សនកិច្ចរបស់ ព្រះបាទ ស៊ីសុវត្ថិ នាឆ្នាំ១៩០៦។

ចាប់តាំងពីការដាក់តាំងបង្ហាញកាលពីខែ តុលា ឆ្នាំ២០២២មក ពិព័រណ៍នេះបានទាក់ទាញអ្នកទស្សនារាប់ពាន់នាក់ និងត្រូវបានពន្យាពេលវេលានៃការបិទបញ្ចប់ពិព័រណ៍ម្តងរួចមកហើយដើម្បីទទួលបានភ្ញៀវឲ្យបានកាន់តែច្រើន។ ថ្ងៃទី៣១ ខែកក្កដា ខាងមុខនេះ គឺជាថ្ងៃចុងក្រោយនៃការតាំងពិព័រណ៍នេះ។

សារមន្ទីរ ស.ស.រ ឬ សារមន្ទីរព្រះស្រីឦសានវរ្ម័ន គឺជាសារមន្ទីរដែលអន្តរកម្មបំផុតនៅក្នុងរាជធានីភ្នំពេញ។ សាធារណជនទាំងអស់អាចអញ្ជើញមកទស្សនាសារមន្ទីរ ស.ស.រ ដើម្បីស្វែងយល់ពីប្រវត្តិសាស្រ្តដ៏គួរឱ្យចាប់អារម្មណ៍របស់ប្រទេសកម្ពុជាក្នុងរយៈកាល ២០០០ឆ្នាំ តាមរយៈការលាយបញ្ចូលគ្នារវាងការតាំងបង្ហាញជាលក្ខណៈឌីជីថល និងវត្ថុបុរាណចាស់ៗ ដែលស្របទៅនឹងសារមន្ទីរបែបទំនើបបំផុត៕