ភ្នំពេញ៖ នៅថ្ងៃទី៨ខែកក្តដានេះ ក្រសួងអប់រំយុវជន និងកីឡា បន្តបើកការប្រកួតប្រជែងការជជែកដេញដោលយុវជនថ្នាក់ជាតិឆ្នាំ២០២៣ វគ្គពាក់កណ្តាលផ្តាច់ព្រ័ត្រ នៅអាគារ Kampus រាជធានីភ្នំពេញ ជាលទ្ធផល ក្រុមសិស្សថ្នាក់ទី១១ មកពីសាលាបញ្ញាសាស្ត្រអន្តរជាតិខេត្តបាត់ដំបង និងសាលាចំណេះទូទៅមីគីវេ រាជធានីភ្នំពេញ គឺត្រូវឡើងទៅប្រកួតវគ្គផ្តាច់ព្រ័ត្រនៅថ្ងៃទី១២ ខែសីហានេះ។

​លោកជំទាវ ស្រូយ សុជាតិ អនុរដ្ឋលេខាធិការ ក្រសួងអប់រំ យុវជន និងកីឡា ថ្លែងថា ការប្រកួតជជែកដេញដោលយុវជនថ្នាក់ជាតិនេះ គឺបានធ្វើតាំងពីខែតុលា ឆ្នាំ២០២២ ដល់ខែសីហា ឆ្នាំ២០២៣ នៅតាមប្រព័ន្ធអនឡាញផង និងនៅរាជធានីភ្នំពេញផង ដែលមានសិស្ស វិទ្យាល័យរដ្ឋ និងឯកជន ថ្នាក់ទី១១ បានជាប់ជម្រើសថ្នាក់ខេត្តរាជធានី ចូលរួមចំនួន៣២ក្រុម ហើយនៅក្នុងការប្រកួតវគ្គពាក់កណ្តាលផ្តាច់ព្រ័ត្រគឺមានសិស្ស៤ក្រុម ជាលទ្ធផលសិស្សថ្នាក់ទី១១ មកពីសាលាបញ្ញាសាស្ត្រអន្តរជាតិខេត្តបាត់ដំបង និងសាលាចំណេះទូទៅមីគីវេ រាជធានីភ្នំពេញ គឺត្រូវជាប់ឡើងទៅប្រកួតវគ្គផ្តាច់ព្រ័ត្រ នៅថ្ងៃទី១២ ខែសីហានេះ ដោយឡែកការប្រកួតការនិយាយជាសាធារណៈ ឯកត្តជន៤រូបចុងក្រោយ នៅថ្ងៃនេះដែរ គឺនឹងត្រូវប្រកាសលទ្ធផលនៅថ្ងៃទី១២ ខែសីហាខាងមុខនេះដែរ ក្នុងទិវាយុវជនអន្តរជាតិ ១២ សីហា។ 

ក្រុមសិស្ស ចូលរួមប្រកួត បានថ្លែងដែរថា នៅក្នុងការប្រកួតប្រជែងជជែកដេញដោល យុវជនថ្នាក់ដឹកជាតិ ឆ្នាំ២០២៣នេះ គឺយើងបានទទួលបទពិសោធន៍ជាច្រើន ជាពិសេសការបង្កើនភាពក្លាហានក្នុងការគិត និងបញ្ចេញមតិប្រកបដោយក្រមសីលធម៌ និងចំណេះដឹងពិតប្រាកដ ការចេះដោះស្រាយបញ្ហាផ្សេងៗដែលពួកគេជួបប្រទះតាមរយៈការសន្ទនា និងការអភិវឌ្ឍខ្លួនក្លាយជាមូលធនមនុស្សសម្រាប់សង្គមជាតិកម្ពុជាជាដើម។

​តាមការបញ្ជាក់បន្ថែមពីលោកជំទាវ ស្រូយ សុជាតិ ឲ្យដឹងថា នៅក្នុងឆ្នាំនេះក្រសួងអប់រំយុវជន និងកីឡា នឹងស្នើសុំថវិកាបន្ថែមក្រសួងសេដ្ឋកិច្ច និងហិរញ្ញវត្ថុ និងពីខាងក្រុមហ៊ុនឯកជនជាដៃគូ ជួយបង្កើនថវិកា ដើម្បីឲ្យថ្នាក់មន្ទីរអប់រំយុវជន និងកីឡាតាមបណ្តាខេត្តរាជធានីភ្នំពេញ បង្កើនការរៀបចំកម្មវិធីប្រកួតប្រជែងជជែកដេញដោលយុវជន នៅតាមបណ្តាវិទ្យាល័យទាំងអស់ នៅទូទាំងខេត្ត រាជធានី ដើម្បីជ្រើសរើសតំណាងក្រុមសិស្សរបស់ខ្លួនឡើងមកប្រកួតថ្នាក់ជាតិ៕​ អត្ថបទ៖ ស៊ុមសុខជា