អាមេរិក ៖ រដ្ឋមន្ត្រីក្រសួងរតនាគារសហរដ្ឋអាមេរិកលោកស្រី ជេណេត យេឡិន (Janet Yellen) បាននិយាយថា កិច្ចប្រជុំទ្វេភាគីរយៈពេល ១០ ម៉ោងជាមួយមន្ត្រីជាន់ខ្ពស់ចិនក្នុងប៉ុន្មានថ្ងៃថ្មីៗនេះគឺជាការជួបគ្នាដោយផ្ទាល់ និង​ប្រកបដោយផ្លែផ្កា ហើយបានជួយរក្សាស្ថិរភាពនៃទំនាក់ទំនងដ៏រង្គោះរង្គើ ខណៈដំណើរ នៅទីក្រុងប៉េកាំងរយៈពេល ៤ ថ្ងៃរបស់លោកស្រី បានបញ្ចប់នៅថ្ងៃអាទិត្យ ទី ៩ ខែកក្កដា នេះ។

លោកស្រី Yellen ដែលចាកចេញពីទីក្រុងប៉េកាំងនៅថ្ងៃអាទិត្យនេះ បានប្រាប់សន្និសីទសារព័ត៌មានមួយថា សហរដ្ឋអាមេរិក និងចិនមានការខ្វែងគំនិតគ្នាយ៉ាងខ្លាំង ហើយប្រទេសទាំង២ត្រូវតែមានការប្រាស្រ័យទាក់ទងគ្នា ច្បាស់លាស់ និងដោយផ្ទាល់ ។ 

ដំណើរទស្សនកិច្ចរបស់លោកស្រី Yellen ក៏រួមបញ្ចូលទាំងការពិភាក្សាជាមួយក្រុមអ្នកជំនាញហិរញ្ញវត្ថុអាកាសធាតុ សេដ្ឋវិទូស្ត្រី និងមន្ត្រីជាន់ខ្ពស់រួមទាំងលោកនាយករដ្ឋមន្ត្រី លី ឈៀង(Li Qiang) ផងដែរ។

ភាគីទាំងពីរបានបន្ទាបការរំពឹងទុកសម្រាប់របកគំហើញក្នុងអំឡុងការពិភាក្សា ខណៈដែលសាទរចំ​ពោះឱកាសការ​ទូតទល់មុខគ្នា៕