ស៊ូដង់ ៖ ការប៉ះទង្គិចគ្នាយ៉ាងខ្លាំងក្លារវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលជាគូប្រជែង​បាន​បន្តនៅក្នុងរដ្ឋធានីខាទូម(Khartoum) និងតំបន់ជុំវិញកាលពីថ្ងៃសៅរ៍ ដោយបានសម្លាប់មនុស្សរាប់សិបនាក់។

យោងតាមក្រសួងសុខាភិបាលរបស់ប្រទេសស៊ូដង់ មនុស្ស ២២ នាក់បានស្លាប់ និងរាប់សិបនាក់បានរងរបួស​នៅក្នុងការវាយប្រហារតាមអាកាសនៅឯទីក្រុង អូមដួម៉ាន់ (Omdurman) តែមួយគត់។

ជម្លោះ​រវាងភាគីទាំងពីរនាពេលថ្មីៗនេះបានកក្រើកឡើងខ្លាំងនៅ Omdurman ក្បែររដ្ឋធានីខាទូម។

គោលដៅយោធាសំខាន់ៗដូចជា មូលដ្ឋានទ័ពអាកាស ទីបញ្ជាការកងវិស្វកម្ម និងទីបញ្ជាការ​កងកម្លាំងបម្រុង​កណ្តាលនៃកងទ័ពស៊ូដង់ដែលស្ថិតនៅក្នុងទីក្រុងនេះ។

ទីក្រុងនេះក៏ជាមូលដ្ឋានផ្គត់ផ្គង់ដ៏សំខាន់សម្រាប់ RSF ដើម្បីផ្ទេរកងទ័ព និងសព្វាវុធពីតំបន់ ដាហ្វួ ( Darfur) នៅភាគខាងលិចប្រទេសស៊ូដង់ ទៅកាន់តំបន់ជុំវិញនៃរដ្ឋធានីនេះ ផងដែរ។

ចាប់តាំងពីដើមខែកក្កដាមក កងទ័ពស៊ូដង់បានប្រមូលផ្តុំកងកម្លាំងពិសេសដើម្បីបើកប្រតិបត្តិការទ្រង់ទ្រាយធំនៅទីក្រុង Omdurman ដោយមានបំណងបោសសម្អាតទាហាន RSF ចេញពីតំបន់នេះ ប៉ុន្តែការតស៊ូដ៏ខ្លាំងក្លារបស់ភាគី ក្រោយមក​បានអូសភាគីទាំងពីរចូលទៅក្នុងសមរភូមិដ៏មហន្តរាយ ក្នុងតំបន់ជាច្រើន។

កាលពីថ្ងៃសៅរ៍ ភាគីទាំងពីរបានប៉ះទង្គិចគ្នានៅអគារទូរទស្សន៍រដ្ឋនៅភាគខាងកើតក្រុង Omdurman និងស្ពាន Halfaya ដែលតភ្ជាប់ភាគខាងជើងរដ្ឋធានី Khartoum និងទីក្រុង Omdurman៕