​បាល់ទាត់៖ ​បាល់ទាត់​ក្រប​ខណ្ឌ​លី​គ​កំពូល​អេ​ស្ប៉ា​ញ La Liga​ បាន​ឈាន​ដល់​សប្ដាហ៍​ទី​៣៧ ចុង​សប្តាហ៍​កន្លងទៅ​ ខណៈ​ជើងឯក​ត្រូវ​រង់ចាំ​សំរេច​នៅ​សប្តាហ៍​ចុងក្រោយ ​បន្ទាប់ពី​ក្រុម​នៅ​ទីក្រុង Madrid ទាំងពីរ​សុទ្ធតែ​ឈ្នះ​រៀងខ្លួន​។

​​ក្រុម​កំពូល​តារាង Atletico Madrid ស្ទើរ​តែ​បាត់បង់ ៣ពិន្ទុ​ទៅ​ហើយ​ក្នុង​សប្តាហ៍​ទី​៣៧ នេះ​នៅ​ពេល​ទទួល​ស្វាគមន៍​ក្រុម​ភ្ញៀវ Osasuna​។ ​Ante Budimir បានតែ​ត​បញ្ចូល​ទី​ឲ្យ​ Osasuna នាំមុខ​នៅ​នាទី​ទី៧៥ ខណៈ​ដែល​ម៉ោង​ដំណាលគ្នា​នេះ Real Madrid កំពុង​នាំមុខ Athletic Bilbao ដោយ​គ្រាប់​បាល់​របស់ Nacho នៅ​នាទី​ទី៦៨​។ ​មាន​ន័យ​ថា​ ក្រុម​របស់​លោក Zinedine Zidane ឡើងឈរ​លើ​គេ​កំពូល​តារាង​បណ្ដោះអាសន្ន​។ តែ​ជោគវាសនា​របស់ Atletico Madrid ត្រូវ​រង់ចាំ​ដល់​នាទី​ទី៨២ ដោយ Renan Lodi ស៊ុត​បញ្ចូល​ទី​តាម​ស្មើ មុន​ពេល​ដែល Luis Suarez ជា​អ្នក​ស៊ុត​គ្រាប់​ជ័យជំនះ​ដ៏​មាន​សារសំខាន់​នៅ​នាទី​ទី៨៨ ចុង​ម៉ោង​ទៅ​ហើយ​។ ​​លទ្ធផល​នេះ​ធ្វើ​អោយ​ក្រុម​របស់​លោក Diego Simeone​ ដែល​នាំមុខ​កំពូល​តារាង​តាំងពី​ខែ​វិច្ឆិកា​នោះ​ បន្ត​នាំមុខ​ដាច់​ក្រុម​លេខ​២ Real Madrid ២​ពិន្ទុ​ដដែល​។

​​ក្រប​ខណ្ឌ La Liga នឹង​បិទ​បញ្ចប់​ចុង​សប្តាហ៍​នេះ​ដោយ Atletico Madrid ធ្វើដំណើរ​ទៅ​ទឹកដី Real Valladolid ខណៈ Real Madrid ទទួល​ភ្ញៀវ Villarreal​។ ​​ចំណែក​ក្រុម​លេខ៣ Barcelona យប់មិញ​បាន​រង​បរាជ័យ​ក្នុង​ទឹកដី​ខ្លួនឯង​ ក្រោម​ថ្វី​ជើង​ក្រុម​ភ្ញៀវ Celta Vigo ២-១​។ ​​Lionel Messi ស៊ុត​បើក​ការ​នាំ​មុខ​នៅ​នាទី​ទី​២៨ មុន​ពេល​ដែល Santi Mina រក​បាន​ ២​គ្រាប់​ម្នាក់ឯង​អោយ Celta Vigo យកឈ្នះ​ការប្រកួត​នេះ​។ ​បរាជ័យ​នេះ​ធ្វើ​អោយ Barcelona នឹង​បញ្ចប់​រដូវ​កាល​ដោយ​នៅ​ក្រៅ Top 2 ជា​លើកដំបូង​តាំងពី​ឆ្នាំ​២០០៧-២០០៨៕

​អត្ថបទ​៖​នាង សុភា​វុ​ធ