រដ្ឋមន្ត្រីការបរទេសរុស្ស៊ីលោក សឺហ្គេយ៍ ឡាវរ៉ូវ ( Sergey Lavrov) បានបើកកិច្ចប្រជុំថ្នាក់រដ្ឋមន្ត្រីលើកទី៦ នៃកិច្ចពិភាក្សាយុទ្ធសាស្ត្ររវាងរុស្ស៊ី និងក្រុមប្រឹក្សាសហប្រតិបត្តិការសម្រាប់រដ្ឋអារ៉ាប់ឈូងសមុទ្រ នៅទីក្រុងមូស្គូ នៅថ្ងៃចន្ទនេះ។

លោក Jassim Muhammad Al-Budaiwi អគ្គលេខាធិការក្រុមប្រឹក្សា បានប្រកាសមុននេះថា កិច្ចប្រជុំនេះ នឹងមានគោលបំណងពង្រឹងទំនាក់ទំនងរវាងរុស្ស៊ី និងបណ្តាប្រទេសឈូងសមុទ្រពែក្ស និងគ្របដណ្តប់លើបញ្ហាសហប្រតិបត្តិការអន្តរជាតិ និងតំបន់។

ក្រុមប្រឹក្សាសហប្រតិបត្តិការសម្រាប់រដ្ឋឈូងឈូងសមុទ្រអារ៉ាប់ គឺជាសហភាពតំបន់ អន្តររដ្ឋាភិបាល នយោបាយ និងសេដ្ឋកិច្ច ដែលរួមមានប្រទេសបារ៉ែន គូវ៉ែត អូម៉ង់ កាតា អារ៉ាប៊ីសាអូឌីត និងអារ៉ាប់រួម។ក្រុមប្រឹក្សានេះ ត្រូវបានបង្កើតឡើងក្នុងឆ្នាំ ១៩៨១។

គោលដៅចម្បងនៃកិច្ចប្រជុំនេះ គឺការសម្របសម្រួលផ្នែកនយោបាយ និងការធ្វើសមាហរណកម្មសេដ្ឋកិច្ចរវាងរដ្ឋជាសមាជិក ក៏ដូចជាអន្តរកម្មក្នុងវិស័យសន្តិសុខ និងការការពារក្នុងតំបន់នៅឈូងសមុទ្រពែក្ស។ កិច្ចប្រជុំលើកដំបូងនៃកិច្ចសន្ទនាយុទ្ធសាស្ត្រក្រុមប្រឹក្សាសហប្រតិបត្តិការរុស្ស៊ី-ឈូងសមុទ្រ ត្រូវបានប្រារព្ធឡើងក្នុងឆ្នាំ ២០១៧ នៅទីក្រុងរីយ៉ាដ៕