ភ្នំពេញ ៖ ឯកឧត្តម ម៉ម ប៊ុនហេង សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធាន​ក្រុមការងារគណបក្សប្រជាជនកម្ពុជា ចុះមូលដ្ឋានខណ្ឌសែនសុខ នាព្រឹកថ្ងៃទី១០ ខែកក្កដា ឆ្នាំ២០២៣នេះ បានអញ្ជើញជួបសំណេះសំណាល និងចុះផ្សព្វផ្សាយគោលនយោបាយ និងបង្រៀនគូសសន្លឹកឆ្នោតសាកល្បង ជូនដល់បុគ្គលិកក្រុមហ៊ុន តេលាកម្ពុជា និងក្រុមហ៊ុន តូយូតា ស្ថិតក្នងសង្កាត់ទឹកថ្លា ខណ្ឌសែនសុខ រាជធានីភ្នំពេញ។

​ក្នុងថ្ងៃទី១០ នៃយុទ្ធនាការចុះអប់រំផ្សព្វផ្សាយគោលនយោបាយ និងបង្រៀនគូសសន្លឹកឆ្នោតសាកល្បង ឯកឧត្តម ម៉ម ប៊ុនហេង បានអំពាវនាវដល់ថ្នាក់ដឹកនាំ បុគ្គលិក គ្រប់ជាន់ថ្នាក់ រួមនឹងអ្នកផ្តល់សេវាកម្ម​ផ្សេងៗ​របស់​ក្រុមហ៊ុន​ទាំងពីរ រួមនឹងប្រជាពលរដ្ឋដែលគ្រប់អាយុ សូមអញ្ជើញទៅបោះឆ្នោតឱ្យបានគ្រប់ៗគ្នា និងបោះឆ្នោត​ជូនគណបក្ស​ប្រជាជនកម្ពុជា ដែលមានលេខរៀងទី១៨ សញ្ញារូបទេវតាបាចផ្កាជាសម្គាល់ ដើម្បីរក្សាសនិ្ដភាព និងការអភិវឌ្ឍ​កសាងសមិទ្ធផលនានាបន្ថែមទៀត ទៅលើសមិទ្ធផលជាច្រើនរាប់មិនអស់ របស់គណបក្សប្រជាជនកម្ពុជា។ ជាមួយគ្នានោះ ឯកឧត្តម ម៉ម ប៊ុនហេង ក៏បានសម្ដែងនូវការសប្បាយរីករាយយ៉ាងខ្លាំង និងថ្លែងអំណរ​គុណយ៉ាង​ជ្រាលជ្រៅ ចំពោះការស្វាគមន៍ និងផ្ដល់ក្ដីស្រលាញ់ គាំទ្រដល់គណបក្សប្រជាជនកម្ពុជាកន្លងមក របស់ថ្នាក់ដឹកនាំ និងបុគ្គលិករបស់ក្រុមហ៊ុនទាំងពីរខាងលើនេះ។

ចំណែកឯកឧត្តម ងី ម៉េង ប្រធានក្រុមការងារចុះជួយសង្កាត់ទឹកថ្លា បានលើកឡើងថា សកម្មភាពនាពេលេនះ មិន​មែន​ជាលើកទីមួយទេ ដែលឯកឧត្តម ម៉ម ប៊ុនហេង ចុះជួបសំណេះសំណាល និងផ្សព្វផ្សាយគោលនយោបាយបក្ស​ទាំង៨ចំនុច រួមទាំងបង្រៀនគូសសន្លឹកឆ្នោតឲ្យបានត្រឹមត្រូវដល់ប្រជាពលរដ្ឋ គឺមានរយៈពេល១០ថ្ងៃជាប់គ្នា ហើយ​សកម្មភាពនេះនឹងបន្ដចុះជាប់ជាប្រចាំ ក្នុងឱកាសនៃការឃោសនារកសំឡេងឆ្នោត រយៈពេល២១ថ្ងៃ ដែលគោរព​តាម​គោលការណ៍របស់ គ.ជ.ប។ ជាពិសេសក៏សូមឲ្យបងប្អូនប្រជាពលរដ្ឋបោះឆ្នោតជូនគណបក្សប្រជាជនកម្ពុជា ដែល​មាន​គោលនយោបាយលើកកម្ពស់សុខមាលភាព លើកកម្ពស់ជីវភាព​និងការរស់នៅរបស់​ប្រជាពលរដ្ឋក្រោម​ដំបូល​សុខសន្តិភាព។

សូមបញ្ជាក់ផងដែរថា គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ការឃោស​នា​​បោះឆ្នោត​ត្រូវប្រព្រឹត្តទៅចាប់ពីថ្ងៃទី១ រហូតដល់ថ្ងៃទី២១ ខែកក្កដា ឆ្នាំ២០២៣ សរុបមានរយៈពេល២១ថ្ងៃ។ គណបក្សនយោបាយ ដែលត្រូវបានទទួលស្គាល់ជាផ្លូវការដោយ គ.ជ.ប ចំនួន១៨ មានសិទ្ធិធ្វើការឃោសនា​រក​សំឡេង​ឆ្នោត ដោយគោរពទៅតាមច្បាប់ បទបញ្ជា និងនីតិវិធីនៃការបោះឆ្នោត សេចក្តីណែនាំ ស្តីពីការឃោសនា​បោះឆ្នោត ក្នុងស្មារតីទទួលខុសត្រូវ និងត្រូវមានការយោគយល់ អធ្យាស្រ័យគ្នាទៅវិញទៅមក៕ អត្ថបទ៖ រដ្ឋា