ជាលើកដំបូង អាល្លឺម៉ង់នឹងបញ្ជូនកងទ័ពទៅកាន់ប្រទេសអូស្ត្រាលី ជាផ្នែកនៃសមយុទ្ធរួមជាមួយនឹងទាហានប្រមាណ ៣០.000 នាក់ មកពីប្រទេសចំនួន ១២ផ្សេងទៀត ដោយបានបញ្ជាក់អំពីការបង្កើនការយកចិត្តទុកដាក់របស់ទីក្រុងប៊ែរឡាំងទៅលើតំបន់ឥណ្ឌូ-ប៉ាស៊ីហ្វិក ចំពេលមានភាពតានតឹងកើនឡើងជាមួយប្រទេសចិន នៅក្នុងតំបន់។

ក្នុងរយៈពេលប៉ុន្មានឆ្នាំថ្មីៗនេះ ប្រទេសអាល្លឺម៉ង់ មានវត្តមានយោធាកាន់តែច្រើន នៅក្នុងតំបន់ឥណ្ឌូ-ប៉ាស៊ីហ្វិក បើទោះបីជាខ្លួនកំពុងស្ថិតក្នុងស្ថានភាពដ៏លំបាករវាងសន្តិសុខ និងផលប្រយោជន៍សេដ្ឋកិច្ចរបស់ខ្លួនក្តី។

ប្រមុខកងទ័ព លោក Alfons Mais បានប្រាប់សារព័ត៌មានរ៉យទ័រក្នុងបទសម្ភាសន៍មួយ ដែលបានចេញផ្សាយនៅថ្ងៃចន្ទនេះ រយៈពេលប៉ុន្មានម៉ោងមុនពេលកងទ័ពអាល្លឺម៉ង់ចាកចេញទៅអូស្ត្រាលីជាលើកដំបូងថា ឥណ្ឌូ-ប៉ាស៊ីហ្វិក គឺជាតំបន់ដែលមានសារៈសំខាន់ខ្លាំងសម្រាប់ពួកយើងនៅក្នុងប្រទេសអាល្លឺម៉ង់ ក៏ដូចជាសម្រាប់សហភាពអឺរ៉ុប ដោយសារការពឹងផ្អែកគ្នាទៅវិញទៅមកលើវិស័យសេដ្ឋកិច្ច។

ប្រទេសចិន គឺជាដៃគូពាណិជ្ជកម្មដ៏សំខាន់បំផុតរបស់ទីក្រុងប៊ែរឡាំង ហើយ ៤០% នៃពាណិជ្ជកម្មបរទេសរបស់អឺរ៉ុប បានហូរកាត់សមុទ្រចិនខាងត្បូង ជាផ្លូវទឹកមួយដែលជាចំណុចសំខាន់សម្រាប់ជម្លោះទឹកដី នៅតំបន់ឥណ្ឌូ-ប៉ាស៊ីហ្វិក។

នៅឆ្នាំ២០២១ នាវាចម្បាំងអាល្លឺម៉ង់១គ្រឿង បានបើកចូលទៅក្នុងសមុទ្រចិនខាងត្បូងជាលើកដំបូង ក្នុងរយៈពេលជិត ២០ឆ្នាំ។ កាលពីឆ្នាំ២០២២ ទីក្រុងប៊ែរឡាំង បានបញ្ជូនយន្តហោះយោធាចំនួន ១៣គ្រឿងទៅធ្វើសមយុទ្ធរួមគ្នានៅក្នុងប្រទេសអូស្ត្រាលី ដែលជាការដាក់ពង្រាយពេលវេលាសន្តិភាពដ៏ធំបំផុតរបស់កងកម្លាំងអាកាស៕