អេក្វាឌ័រ៖ ជំរឿនជាតិបានបង្ហាញកាលពីថ្ងៃច័ន្ទថា អ្នកទោសប្រមាណ១ភាគ៦ នៅក្នុងពន្ធនាគារប្រទេសអេក្វាឌ័រ មិនត្រូវបានកាត់ទោសនោះទេ ខណៈប្រធានាធិបតីលោក Guillermo Lasso បានជំរុញឱ្យប្រព័ន្ធតុលាការធ្វើឲ្យបានលឿនដើម្បីជួយសម្រាលបន្ទុកលើពន្ធនាគារដែលមានអ្នកទោសច្រើនកកកុញ។ លោក Lasso ដែលនឹងចាកចេញពីតំណែងនៅចុងឆ្នាំនេះ បន្ទាប់ពីការបោះឆ្នោតនៅពេលខាងមុខ បានប្រាប់អ្នកសារព័ត៌មានថា ចំនួនអ្នកទោសបច្ចុប្បន្នមានរហូតដល់ ៣១.៣២១នាក់ ហើយអ្នកទោសភាគច្រើនត្រូវបានចាប់ខ្លួនពីបទជួញដូរគ្រឿងញៀន ប្លន់ ឬករណីមនុស្សឃាត។ តួលេខនេះគឺលើសពីសមត្ថភាពដាក់អ្នកទោសមានចំនួនត្រឹម ៣០.១៣៤នាក់ ដែលទីភ្នាក់ងារពន្ធនាគារ (SNAI) បាននិយាយថាប្រព័ន្ធពន្ធនាគារចំនួន៣៦កន្លែង មាននៅក្នុងខែធ្នូ ឆ្នាំ ២០២២។ ទីភ្នាក់ងារពន្ធនាគារ បាននិយាយកាលពីខែមិថុនាថា ភាពចង្អៀតណែនគឺមានដល់ ១២,៩% ប៉ុន្តែក្រុមមន្ត្រី មិនបានផ្តល់តួលេខធ្វើបច្ចុប្បន្នភាពថ្មីសម្រាប់ភាពចង្អៀតណែនលើសកម្រិតនោះទេ។ ប្រព័ន្ធពន្ធនាគាររបស់ប្រទេសអេក្វាឌ័រ បានប្រឈមបញ្ហារចនាសម្ព័ន្ធជាច្រើនទសវត្សរ៍មកហើយ ក្នុងពេលមានមនុស្សច្រើនលើសលប់ និងលក្ខខណ្ឌរស់នៅមិនច្បាស់លាស់សម្រាប់អ្នកទោស ប៉ុន្តែកុបកម្មបានក្លាយជារឿងធម្មតាទៅហើយ បណ្តាលឲ្យអ្នកទោសជាង ៤០០នាក់ស្លាប់ចាប់តាំងពីចុងឆ្នាំ ២០២០។ លោក Lasso បាននិយាយថា ជំរឿនបានបង្ហាញថាមនុស្សជាង ៥.០០០នាក់ ឬ ១៦% នៃអ្នកទោសសរុបត្រូវបានកាត់ឲ្យជាប់ទោសពីបទឧក្រិដ្ឋ ប៉ុន្តែមិនទាន់ត្រូវបានកាត់ទោស ឬកំពុងត្រូវបានឃុំខ្លួននៅក្នុងពន្ធនាគារនៅឡើយដែលកំពុងរង់ចាំការកាត់ទោស ដោយលោកនិយាយថាថាតួលេខនេះ នឹងជាមូលហេតុសម្រាប់ការព្រួយបារម្ភក្នុងចំណោមប្រព័ន្ធតុលាការ។ លោក Lasso និយាយថា គោលនយោបាយរបស់យើងគឺមិនឱ្យមានអ្នកទោសបន្ថែម ឬសាងសង់ពន្ធនាគារបន្ថែមនោះទេ គោលនយោបាយរបស់យើងគឺត្រូវដោះលែងអ្នកទាំងឡាយណាដែលសមនឹងទទួលបានសេរីភាព ព្រោះពួកគេបានកាត់ទោសរបស់ពួកគេរូចហើយ ។