​បាល់ទាត់៖ ​ក្រុម Besiktas​ បាន​ក្លាយ​ជា​ជើងឯក ​ការប្រកួត​ក្រប​ខណ្ឌ​លី​គ​កំពូល​​ទួរគី​នៅ​សប្តាហ៍​ចុង​ក្រោយ​នៃ​រដូវ​កាល បន្ទាប់ពី​ស្មើ​ពិន្ទុ​ជាមួយ​ក្រុម​លេខ​២ Galatasaray​ និង​ខុស​តែ​គ្រាប់​បាល់​ចំណេញ​តែ ១​គ្រាប់​ប៉ុណ្ណោះ​។ ​សប្តាហ៍​ចុងក្រោយ Besiktas​ បាន​យកឈ្នះ​នៅ​ទឹកដី Goztepe S.K. ២-១ ខណៈ Galatasaray​ យកឈ្នះ Yeni Malatyaspor ៣-១​។

​​ក្រោយ​លេង​បាន ៤០ប្រកួត​ក្នុងចំណោម ២១ក្រុម Besiktas​ បាន​ក្លាយ​ជា​ជើងឯក​ដោយមាន​សរុប ៨៤ពិន្ទុស្មើ​ជាមួយ Galatasaray ​តែ Besiktas​ មាន​គ្រាប់​បាល់​ចំណេញ ៤៥គ្រាប់ ​ខណៈ ​Galatasaray ​មាន​គ្រាប់​បាល់​ចំណេញ ៤៤គ្រាប់​។ ​លេខ៣ គឺ Fenerbahce​ មាន ៨២ពិន្ទុ​ពោល​គឺ​ជើងឯក​លី​គ​កំពូល​​ទួរគី​មាន ​៣ក្រុម​ប្រជែង​គ្នា​នៅ​សប្តាហ៍​ចុងក្រោយ​។ ​តាមពិត​នៅ​លី​គ​កំពូល​ទួរគី​ បើ​ក្រុម​ណា​មាន​ពិន្ទុ​ស្មើគ្នា​ដូច​ករណី Besiktas​ និង​ Galatasaray ​នេះ​ត្រូវ​បាន​គេ​កំណត់​ដោយ​រូបមន្ត Head-to-Head តែ​ក្រុម​ទាំងពីរ​ស្មើគ្នា​ក្នុង​ករណី​នេះ​ទៀត​ បន្ទាប់ពី​ឈ្នះ​គ្នា​ទៅវិញទៅមក​គំលាត ៣​គ្រាប់​ដូចគ្នា​ដែល​ធ្វើ​អោយ​គេ​គិត​ពី​គ្រាប់​ចំណេញ​វិញ​។

​​នេះ​ជា​ជើងឯក​លី​គ​កំពូល​ទួរគី​លើក​ទី ១៦ សំរាប់ Besiktas​ ខណៈ Galatasaray​ នៅតែ​ជា​ក្រុម​ឈ្នះ​ជើងឯក​ច្រើន​ជាង​គេ​សរុប ២២​លើក តាម​ពីក្រោយ​ដោយ Fenerbahce ១៩​លើក ក្រៅពីនោះ​មាន ​Trabzonspor ៦​លើក, Istanbul Basaksehir ១​លើក និង Bursaspor ១​លើក​៕

​អត្ថបទ​៖​នាង សុភា​វុ​ធ