ភ្នំពេញ៖ ក្រសួងអប់រំ យុវជន និងកីឡា ព្រឹកថ្ងៃទី១១ ខែកក្កដា ឆ្នាំ២០២៣នេះ បានប្រកាសបើក​យុទ្ធនាការគាំទ្រការអប់រំឌីជីថល សម្រាប់សិស្សានុសិស្សនៅគ្រឹះស្ថានមធ្យម​សិក្សារាជធានីភ្នំពេញ ដោយមានការចូលរួមពីលោក លោកស្រី ជាគណៈនាយកគ្រឹះស្ថានមធ្យមសិក្សាសាធារណៈ និងឯកជន សរុបចំនួន២៣៦នាក់។

បើតាមលោក ហែម ស៊ីណារ៉េត ប្រធានមនី្ទរអប់រំ យុវជន និងកីឡា បានឲ្យដឹងថា មនី្ទរអប់រំ យុវជន និងកីឡា រាជធានីភ្នំពេញ មានគ្រឹះស្ថានសរុបចំនួន៨១៣សាលា ក្នុងគ្រឹះស្ថានសិក្សា​សាធារណៈចំនួន២៤៨សាលា បុគ្គលិកអប់រំគ្រប់ក្របខណ្ឌសរុប១០,៤៥២នាក់ និងសិស្សានុសិស្សគ្រប់ភូមិសិក្សាសរុបចំនួន៤៩៦,៥០៤នាក់។

ជាមួយគ្នានោះដែរ ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានថ្លែងថា យុទ្ធនាការគាំទ្រការអប់រំឌីជីថល ​សម្រាប់សិស្សានុសិស្សកម្រិតមធ្យមសិក្សា ដោយចាប់ផ្តើមជាដំបូងនៅក្នុងក្របខណ្ឌរាជធានីភ្នំពេញ ​ចាប់ផ្តើមពីថ្នាក់ទី១០ រហូតដល់ថ្នាក់ទី១២ ក្នុងដំណាក់កាលទី១ នៅខែកក្កដា។

ដោយឡែកដំណាក់កាលទី២ ក្រុមការងារនឹងរៀបចំធ្វើនៅអំឡុងខែកញ្ញា ដែលជាផ្នែកមួយ​សម្រាប់គោរពជូនដល់លោកគ្រូ អ្នកគ្រូ តាមរយៈការដឹកនាំ ការបង្រៀន ​តាមវិធីសាស្រ្តបែបថ្មី ក្នុងបរិបទនៃការអប់រំឌីជីថល។ ហើយមួយផ្នែកទៀត ​គឺជូនដល់សិស្សានុសិស្សពីថ្នាក់ទី៧ រហូត​ដល់ថ្នាក់ទី១២ទាំងអស់គ្នា។

សូមបញ្ជាក់ផងដែរថា យុទ្ធនាការនេះ នឹងត្រូវអនុវត្តនៅតាមគ្រឹះស្ថានមធ្យមសិក្សារដ្ឋចំនួន៣៨ នៅរាជធានីភ្នំពេញ ហើយសិស្សានុសិស្សជាង៤០ពាន់នាក់ ដែលកំពុងសិក្សានៅ​កម្រិត​មធ្យមសិក្សាទុតិយភូមិ ​នឹងទទួលការបណ្តុះបណ្តាលដោយគរុនិស្សិត និងគរុសិស្សស្ម័គ្រចិត្ត​ចំនួន៣៦៧នាក់ ហើយដែលត្រូវចុះផ្ទាល់ទៅកាន់ថ្នាក់រៀន ជិត១០០០បន្ទប់៕អត្ថបទ រដ្ឋា